UEFA-nyň Çempionlar ligasynyň çärýek finalynyň jogap duşuşyklary geçirildi. Onda Fransiýanyň “PSŽ” topary myhmançylykda Angliýanyň “Aston Willa” topary bilen duşuşan bolsa, Ispaniýanyň “Barselona” topary hem myhmançylykda Germaniýanyň “Borussiýa Dortmund” topary bilen duşuşdy.
Fransuz topary myhmançylykda 3:2 hasabynda utuldy. Ýöne birinji duşuşykda 3:1 hasabynda utandygy üçin ýarym finala çykdy. “PSŽ” toparynyň düzüminde 11-nji minutda Aşraf Hakimi we 28-nji minutda Nunu Mendeş tapawutlandy. Iňlis toparynyň gollaryny 34-nji minutda Ýuri Tilemans, 55-nji minutda Jon Makginn hem-de 57-nji minutda Ezri Konsa geçirdi.
Beýleki duşuşykda hem “Barselona” topary myhmançylykda german toparyna 3:1 hasabynda utuldy. Ýöne ispan ägirdi birinji duşuşykda 4:0 hasabynda utandygy üçin ýarym finala çykmagy başardy.
Fransiýanyň “PSŽ” topary entek UEFA-nyň Çempionlar ligasynda çempion bolmagy başarmady. 2020-nji ýylda bu topar finala çykdy, ýöne finalda Germaniýanyň “Bawariýa” toparyna 1:0 hasabynda utulypdy.