Türkmenistanyňdaky Özbegistanyň ilçisi Rawşanbek Alimow Aşgabadyň häkimi Rahym Gandymow bilen duşuşyk geçirdi diýip, “Dünýä” habar gullugynyň habar berýär.
Duşuşygyň dowamynda taraplar iki ýurduň paýtagtlarynyň arasyndaky hyzmatdaşlygyň mundan beýläk-de ösdürilmeginiň mümkinçiliklerini ara alyp maslahatlaşdylar. Hususan-da, Daşkent hem-de Aşgabadyň häkimlikleriniň arasyndaky doganlaşan şäherler baradaky Ylalaşygyň ýerine ýetirilişi bilen bagly meselelere garaldy.
Duşuşykda aýratyn üns Aşgabadyň “Daşkent” seýilgähiniň hem-de Daşkentdäki “Aşgabat” seýilgähiniň döredilmegine berildi. Bu seýilgähler Özbegistan bilen Türkmenistanyň halklarynyň arasyndaky dostlugyň we özara düşünişmegiň täze nyşany boldy.
Taraplar medeni-ynsanperwer hyzmatdaşlygy giňeltmek hem-de “Daşkent” seýilgähini Aşgabadyň ýaşaýjylarynyň we myhmanlarynyň arasynda wagyz etmek arkaly yzygiderli medeni çäreleri geçirmek barada ylalaşdylar.
Şeýle hem paýtagtlaryň wekiliýetleriniň Daşkentde we Aşgabadda geçirilýän halkara çärelerde özara gatnaşmagy barada pikir alyşdylar.
Hususan-da, Aşgabadyň häkimliginiň wekilleriniň 2025-nji ýylyň 27–29-njy noýabry aralygynda geçirilmegi meýilleşdirilen “Beýik Ýüpek ýolundaky syýahatçylyk” atly Daşkent halkara syýahatçylyk sergisine gatnaşmagy ikitaraplaýyn hyzmatdaşlygy pugtalandyrmagyň möhüm ädimi hökmünde bellenildi.