Günorta Koreýanyň paýtagty Seul şäherinde saparda bolýan Türkmenistanyň Ministrler Kabinetiniň Başlygynyň orunbasary Baýmyrat Annamämmedow Günorta Koreýanyň Premýer-ministri Han Dok Su bilen duşuşdy. Bu barada koreý metbugaty habar berýär.
Taraplar Türkmenistan bilen Koreýa Respublikasynyň arasyndaky senagat, gurluşyk, medeniýet we bilim ulgamlaryndaky hyzmatdaşlygy has-da pugtalandyrmaga degişli meseleleri ara alyp maslahatlaşdylar.
Han Dok Su iki ýurduň arasyndaky hyzmatdaşlygyň derejesine ýokary baha berip, koreý kompaniýalarynyň Türkmenistandaky iri infrastruktura taslamalaryna has işjeň gatnaşmaga hem-de ykdysady hyzmatdaşlygy pugtalandyrmaga taýýardyklaryny belledi.
Türkmenistanyň Ministrler Kabinetiniň Başlygynyň orunbasary Baýmyrat Annamämmedow koreý kompaniýalarynyň Türkmenistandaky işleri barada aýdyp, iki ýurduň arasyndaky hyzmatdaşlygy giňeltmäge gyzyklanma bildirýändiklerini mälim etdi.
