2025-nji ýylyň 19-23 oktýabry aralygynda Ženewa şäherinde Birleşen Milletler Guramasynyň Söwda we ösüş boýunça konferensiýasynyň (ÝUNKTAD) 16-njy sessiýasy geçirildi. Oňa Türkmenistanyň Söwda we daşary ykdysady aragatnaşyklar ministri N.Agahanowyň ýolbaşçylygyndaky türkmen wekiliýeti gatnaşdy.
20-nji oktýabrda N.Agahanow plenar mejlisde eden çykyşynda Türkmenistanyň açyk, özara bähbitli hem-de durnukly söwda-ykdysady hyzmatdaşlygyň ýörelgelerine ygrarlydygyny nygtady, şeýle hem ösüp barýan döwletleriň arasyndaky hyzmatdaşlyk gatnaşyklary berkitmegiň möhümdigini belledi.
Şol gün türkmen wekiliýeti ÝUNKTAD-yň Baş sekretary Rebekka Grinspan bilen duşuşyk geçirdi. Duşuşygyň dowamynda taraplar hyzmatdaşlygyň ileri tutulýan ugurlaryny, şol sanda sanly söwda ulgamynyň ösdürilmegini, eksport mümkinçilikleriniň giňeldilmegini we ählumumy üpjünçilik zynjyrlarynyň durnuklylygyny ýokarlandyrmagy ara alyp maslahatlaşdylar.
ÝUNKTAD-yň 16-njy sessiýasynyň çäklerinde türkmen wekiliýeti birnäçe duşuşyklary we çäreleri geçirdi. Şolaryň arasynda deňze çykalgasy bolmadyk ösüp barýan döwletler (LLDC) boýunça geçirilen panel ara alyp maslahatlaşmalar we maslahatlar bar. Olaryň netijeleri boýunça ministrler ulag we söwda gatnaşyklarynyň ösdürilmegi baradaky bilelikdäki beýanaty kabul etdiler.
Mundan başga-da, Ženewa bitaraplyk merkeziniň, Şweýsariýanyň Birleşen söwda edarasynyň (JCC) hem-de Halkara söwda merkeziniň (ITC) wekilleri bilen gepleşikleri geçirildi. Gepleşiklerde hyzmatdaşlygy giňeltmegiň, eksporty ilerletmegiň, durnukly ykdysady gatnaşyklary pugtalandylmagyň meseleleri ara alnyp maslahatlaşyldy.
ÝUNKTAD-yň 16-njy sessiýasynyň netijeleri boýunça Türkmenistanyň wekiliýeti ýurduň durnukly ykdysady ösüşine we daşary ykdysady gatnaşyklarynyň dürli ugurlar boýunça giňeldilmegine ýardam bermek maksady bilen halkara düzümler bilen hyzmatdaşlygy mundan beýläk-de pugtalandyrmaga taýýardygyny tassyklady.