Türkmenistanyň daşary işler ministri Raşid Meredow, ABŞ-nyň daşary işler ministri Marko Rubio hem-de ABŞ-nyň Günorta we Merkezi Aziýa boýunça ýörite wekili Serjio Gor 30-njy ýanwarda telefon arkaly söhbetdeşlik geçirdiler. Bu barada ABŞ-nyň Daşary işler ministrligi habar berýär.
Söhbetdeşligiň dowamynda taraplar Merkezi Aziýada sebit howpsuzlygyny we ykdysady durnuklylygy pugtalandyrmak babatda gazanylan ösüşleri ara alyp maslahatlaşdylar.
ABŞ-nyň Döwlet sekretary Marko Rubio Amerikanyň Birleşen Ştatlarynyň işewürlik gatnaşyklaryny giňeltmek hem-de ikitaraplaýyn hyzmatdaşlygy has-da berkitmek maksady bilen Türkmenistan bilen hyzmatdaşlyga ygrarlydygyny tassyklady diýip, ABŞ-nyň Döwlet departamentiniň metbugat beýanatynda bellenilýär.
Bu telefon söhbetdeşligi soňky aýlarda Aşgabat bilen Waşingtonyň arasynda alnyp barylýan işjeň dialogyň dowamydyr. 2026-njy ýylyň 23-nji ýanwarynda Aşgabatda Türkmenistanyň Prezidenti Serdar Berdimuhamedow we türkmen halkynyň Milli Lideri Gurbanguly Berdimuhamedow ABŞ wekiliýeti bilen duşuşyklary geçirdiler. Bu wekiliýetiň düzümine ABŞ-nyň goşun ministri Deniel Driskoll hem-de ABŞ Prezidentiniň Günorta we Merkezi Aziýa boýunça ýörite wekili Serjio Gor girýärdi.
Şol duşuşyklaryň dowamynda özara hormat goýmak, ynam we düşünişmek ýörelgelerine esaslanýan özara bähbitli hyzmatdaşlygy çuňlaşdyrmagyň möhümdigi nygtaldy. Syýasy dialog, söwda-ykdysady hyzmatdaşlyk, sebit durnuklylygy, energetika, ulag, şeýle hem howanyň üýtgemegi we durnukly ösüş ýaly ählumumy meseleleri ara alnyp maslahatlaşyldy.
«Merkezi Aziýa — ABŞ» formatynyň netijeliligi hem-de türkmen-amerikan işewürlik geňeşiniň işewürlik gatnaşyklaryny goldamakdaky roly aýratyn bellenildi.
Mälim bolşy ýaly, Türkmenistanyň daşary işler ministri Raşid Meredow 2025-nji ýylyň awgustynda Waşingtonda saparda bolup, ABŞ-nyň daşary işler ministri Marko Rubio bilen duşuşypdy.