Türkmenistanyň Mejlisiniň ýedinji çagyrylyşynyň sekizinji maslahatynda «Kazyýet hakynda» Türkmenistanyň Kanunynyň täze beýanynyň taslamasy deputatlaryň garamagyna hödürlendi.
Kazyýet kanunçylygynyň döwrüň talaplaryna laýyklykda kämilleşdirilmegi bilen baglylykda, çuň pikirlenip bilýän, giň düşünjeli, zerur hünär endiklerine eýe bolan, ýokary derejeli hünärmenleri taýýarlamak möhüm wezipeleriň biri bolup durýar. Şundan ugur alnyp, bu ugurda kämil hünärmenleri taýýarlamak ýurdumyzyň kazyýet ulgamyny özgertmegiň esasy ugurlarynyň hataryndadyr. Sebäbi kazylaryň wezipe ygtyýarlyklaryny jogapkärli ýerine ýetirmeginiň netijeliligi köp babatda işgärleriň hünär derejesine bagly bolup durýar.
Taslamada «Maşgala işleri boýunça kazylar» atly täze bölüm goşmak göz öňünde tutulýar. Maşgalanyň, eneligiň, atalygyň we çagalygyň döwlet goragynyň üpjün edilmeginde adyl kazyýetliligiň ähmiýetini ýokarlandyrmak, maşgala işleri boýunça adyl kazyýetliligiň we kazyýet önümçiligiň ýokary hünär ussatlygy şertlerinde amala aşyrylmagyny gazanmak we maşgalanyň jebisliginiň kepilliklerini berkitmek maksady bilen kazyýetleriň kazylarynyň umumy sanynyň çäginde etrap we etrap hukukly şäher kazyýetlerinde maşgala işleri boýunça kazynyň wezipesini, Türkmenistanyň Ýokary kazyýetiniň, welaýat, welaýat hukukly we döwlet ähmiýetli şäher kazyýetleriniň gurluş düzümine «Maşgala işleri boýunça kazyýet kollegiýalaryny» girizmek göz öňünde tutulýar.
Şeýle hem taslamada maşgala işleri boýunça kazy wezipesiniň girizilmeginiň şertleri, kazynyň borçlary we ygtyýarlyklary, onuň bolmadyk ýagdaýynda wezipeleriniň ýerine ýetirilmeginiň tertibi, maşgala işleri boýunça kazy wezipesine dalaşgärlige bildirilýän talaplar, kazyýetleriň Prezidiumynyň döredilmeginiň tertibi, kazylaryň we kazyýet edaralarynyň işgärleriniň zähmet hem-de durmuş goraglylygynyň kepillikleriniň ýokarlandyrylmagy, adyl kazyýetligiň nyşanlary, kazyýetleriň işiniň maliýeleşdirilmegi, kömekçi hojalygy üçin bölünip berlen ýerlerde hojalyk işleriniň amala aşyrylmagy netijesinde alnan girdejileriň bellenen tertipde peýdalanylmagy bilen bagly kadalary kesgitlemek göz öňünde tutulýar.
Mejlisiň ýedinji çagyrylyşynyň nobatdaky maslahatynyň garamagyna hödürlenilen kanunlaryň taslamalary biragyzdan goldanyldy we kabul edildi.