Şu gün Bütindünýä welosiped gününiň baýramçylyk dabaralary ruhubelentlige, şatlyk-şowhuna beslendi. Ir bilen paýtagtymyz Aşgabatda, Arkadag şäherinde hem-de welaýat merkezlerinde köpçülikleýin welosipedli ýörişler geçirildi.
Welosipedli ýörişe badalga berilýän ýerde belent ruhda ýaňlanan aýdym-sazlaryň astynda ýerine ýetirilen köpçülikleýin bedenterbiýe maşklary özboluşly sazlaşygy emele getirdi.
Ajaýyp döwürde gurlup ulanmaga berlen il-ýurt ähmiýetli, medeni-durmuş maksatly döwrebap binalary uly buýsanç bilen synlan welosipedçiler ýörişi uly ruhubelentlik bilen dowam etdirdiler. Barha bagy-bossanlyga bürenýän, döwrebap binalary bilen gözel görke eýe bolýan ýurdumyzyň ajaýyp keşbinde Berkarar döwletiň täze eýýamynyň Galkynyşy döwründe ilatyň ýaşaýyş-durmuş derejesini ýokarlandyrmak, ýurt abadançylygyny üpjün etmek babatdaky şähergurluşyk we ekologiýa syýasatynyň oňyn netijeleri aýdyň şöhlelenýär.