Türkmenistanyň Futbol federasiýasy tarapyndan 27-nji dekabrda guralan baýrak gowşurylyş dabarasynda ýurdumyzyň futbol çempionatynyň hem-de ýaşlar birinjiliginiň geçen möwsüminde tapawutlanan oýunçylar bilen birlikde tälimçi hem-de toparlar sylaglanyldy.
Dabaranyň başynda AFK-nyň PRO derejeli tälimçilik okuwyny üstünlikli tamamlan türkmenistanly tälimçilere dabara bilen AFK-nyň PRO derejeli tälimçilik ygtyýarnamalary gowşuryldy. Dört tapgyrdan ybarat bolan AFK-nyň PRO derejeli tälimçilik okuwy türkmenistanly tälimçileriň gatnaşmagynda Aşgabat şäherinde geçirilipdi.
Ýurdumyzyň futbol çempionatynyň hem-de ýaşlar birinjiliginde tapawutlananlaryň köpçülikleýin habar beriş serişdeleriniň sport žurnalistleriniň we Ýokary liganyň futbol klublarynyň wekilleriniň arasynda ýazuw arkaly geçirilen pikir-soraşmanyň netijesinde kesgitlenendigini bellemek gerek.
Geçirilen ses berlişigiň netijesinde “Ahal” toparynyň ýarymgoragçysy Elman Tagaýew “Iň ökde oýunçy” diýlip yglan edildi. Bassyr ikinji ýyl bu baýraga mynasyp bolan futbolça baýragy hem-de tälimçilerimize AFK-nyň PRO derejeli tälimçilik ygtyýarnamalaryny Türkmenistanyň Futbol federasiýasynyň başlygy Guwançmuhammet Öwekow bilen TFF-niň Baş sekretary Serdar Geldiýew gowşurdylar.
Türkmenistanyň futbol çempionatynda geçen möwsüminde garşydaşlarynyň derwezesinden 31 gol geçirip, iň köp top geçiren oýunçylaryň arasynda öňdeligi eýelän Didar Durdyýewe (“Arkadag”) baýragy gowşurmak halypa futbolçy Berdimyrat Nurmyradowa ynanyldy.
Geçirilen dabarada “Iň ökde tälimçi” diýlip yglan edilen “Arkadag” toparynyň tälimçisi Wladimir Baýramowa sylagy Guwançmuhammet Öwekowyň dabara bilen gowşurandygyny bellemek gerek. Geçen möwsümde W.Baýramowyň tälimçiligindäki “Arkadag” topary Türkmenistanyň futbol çempionatyny, Kubok bäsleşigini hem-de Naýbaşy kubogy ugrundaky duşuşygy ýeňiş bilen tamamlady.
“Arkadag II” toparynyň hüjümçisi Enwer Annaýew Ýokary liganyň futbol klublarynyň ýaşlar düzümleriniň gatnaşmagyndaky futbol boýunça Türkmenistanyň birinjiliginiň “Iň ökde oýunçysy” diýlip yglan edildi. Şeýle-de, garşydaşlarynyň derwezesinden netijeli urgularyň 32-sini geçiren E.Annaýew iň köp top geçiren oýunçylaryň arasynda öňe saýlandy. Zehinli futbolçymyza baýragy gowşurmagy Türkmenistanyň at gazanan tälimçisi Baýram Durdyýewe ynanylmagy aýratyn bellenilmäge mynasypdyr.
Halypa tälimçilerimiziň ýene-de biri, Ali Gurbany çempionatyň dowamynda “Adalatly oýun görkezen topar” ugrundaky baýraga mynasyp bolan “Arkadag” toparyna hem-de ýaşlar birinjiliginde bu baýragy eýelän “Arkadag II” toparyna baýraklary gowşurdy.
Halkara derejeli emin Kakabaý Seýdow geçen möwsümiň dowamynda wajyp duşuşyklaryň birnäçesinde eminlik eden Resul Mämmedowa “Iň ökde emin” diýen ugurda gazanan baýragyny gowşurdy.
Geçirilen baýrak gowşurylyş dabarasynda Naýbaşy futzal ligasyna gatnaşan toparlarymyz hem ýadygärlik sowgatlary bilen sylaglanyldylar. Bu ugurdaky baýraklary TFF-niň wekili Maksat Seýitgulyýew gowşurdy.
Ýakynda karýerasyny tamamlan türkmen futbolunyň görnükli wekili Arslanmyrat Amanowa Türkmenistanyň Futbol federasiýasy tarapyndan taýýarlanan baýragyň gowşurylandygy aýratyn bellenilmäge mynasypdyr. Zehinli futbolçymyza baýragy TFF-niň Baş sekretary Serdar Geldiýew gowşurdy. Ýeri gelende bellesek, ýurdumyzyň futbol çempionatynyň soňky iki ýylynyň çempiony “Arkadag” toparynyň kapitany bolan A.Amanowyň Arkadag şäheriniň adybir toparynyň gazanan üstünliklerine mynasyp goşant goşandygyny bellemek gerek.
Dabaranyň soňunda gatnaşyjylar ýadygärlik suratlara düşdüler.
Şeýle-de, Türkmenistanyň futbol çempionatynyň iň ökde futbolçylarynyň 22-ligi hem seçilip alyndy.
Birinji düzüm: Rüstem Ahallyýew (“Arkadag”) – derwezeçi; Güýçmyrat Annagulyýew, Abdy Bäşimow, Ybraýym Mämmedow (“Arkadag”), Şöhrat Söýünow (“Altyn Asyr”) – goragçylar; Şanazar Tirkişow, Welmyrat Ballakow, Resul Hojaýew (hemmesi “Arkadag”), Elman Tagaýew ( “Ahal”) – ýarym goragçylar; Didar Durdyýew, Altymyrat Annadurdyýew (ikisi-de “Arkadag”) – hüjümçiler.
Ikinji düzüm: Rahat Japarow ( “Ahal”) – derwezeçi, Mekan Saparow (“Arkadag”), Hakmuhammet Bäşimow (“Ahal”), Zafar Babajanow, Serdar Annaorazow (ikisi-de “Altyn Asyr”) – goragçylar; Ilýa Tamurkin, Şamämmet Hydyrow (ikisi-de, “Arkadag”), Ahmet Ataýew, Myrat Annaýew (ikisi-de “Altyn Asyr”) – ýarym goragçylar; Begenç Akmämmedow (“Arkadag”), Mihail Titow (“Altyn Asyr”) – hüjümçiler.