Türkmenistanda ilkinji gurulan “Gadamly” atly gämisiniň deňiz suwuna düşürmek dabarasy geçirildi. Bu barada Türkmenistanyň bilim ministrligi habar berýär.
Konteýner daşamaklyga niýetlenen, 6100 tonna ýük göterijiligi bolan bu gury ýük gämisi hazarýaka döwletlerine öz ýüzüşlerini amala aşyryp, ýük daşamakda ýokary orunlara eýe bolup, Türkmenistanyň ykdysadyýetiniň ösmegine goşant goşar.
Gäminiň gurluşygy “Balkan” gämi gurluşyk we abatlaýyş zawody” açyk görnüşli paýdarlar jemgyýeti (AGPJ) bilen Koreýa Respublikasynyň “Koryo Shipbuilding Industry Technology Co. Ltd.” Kompaniýanyň hyzmatdaşlygynda amala aşyryldy.
Açylyş dabarasyna Koreýanyň Türkmenistandaky ilçihanasynyň işleri wagtlaýyn ynanylan wekili Kim Jun Çol hem gatnaşdy.
“Gadamly” Türkmenistan bilen Günorta Koreýanyň barha berkeýän hyzmatdaşlygynyň miwesidir, bu gatnaşyklar 1992-nji ýylda diplomatik gatnaşyklaryň ýola goýulmagyndan gözbaş alýar.
Wagtyň geçmegi bilen bu hyzmatdaşlyk giňäp, dürli ugurlary öz içine aldy, gämi gurluşygy Günorta Koreýanyň döwrebap gämileriň gurluşygyndaky baý tejribesi bilen aýratyn tapawutlanýan ugra öwrüldi.
2023-nji ýylyň iýul aýynda gämi gurluşygy boýunça hyzmatdaşlyk barada möhüm şertnama baglaşyldy, şondan soň bolsa, Türkmenbaşy şäherindäki Balkan gämi gurluşyk we abatlaýyş zawody bilen Günorta Koreýanyň “Koryo Shipbuilding Industry Technology Co., Ltd. (KSIT)” kompaniýasynyň arasynda 42 million dollarlyk şertnama baglaşyldy.
Bu şertnama iki sany köp maksatly, hersiniň ýük göterijiligi 6100 tonna bolan gury ýük gämilerini taslamalaşdyrmak, gurmak we enjamlaşdyrmak işlerine gönükdirildi. “Gadamly” – olaryň ilkinjisidir. Ol Türkmenbaşydaky “Balkan” gämi gurluşyk zawodynyň binýadynda, koreýaly hünärmenleriň goldawy bilen gurlup, şolaryň tehnologiýa, enjam we ýerli işgärleri taýýarlamak babatdaky tejribesini geçirmek arkaly amala aşyryldy.