Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda giň sport hyzmatdaşlygyny alyp barýan Türkmenistan sport arkaly halklary parahatçylyga, agzybirlige, ösüşe çagyrýar. Diýarymyzda häzirki wagtda sportuň dürli görnüşleri uly üstünliklere eýe bolup, olar bilen meşgullanýan ýaşlaryň sany barha artýar.
Dünýä ölçeglerine laýyklykda gurlan, sebitimiziň iň döwrebap sport desgalar toplumy bolan Aşgabat şäherindäki Olimpiýa şäherçesiniň sport desgalarynyň binýadynda halkara sport guramalary bilen özara hyzmatdaşlykda birnäçe halkara sport ýaryşlary geçirildi. Şolaryň hatarynda Ýapyk binalarda we söweş sungaty boýunça V Aziýa oýunlarynyň, Agyr atletika hem-de Kuraş boýunça dünýä çempionatlarynyň, sebitleýin halkara sport bäsleşikleriniň üstünlikli geçirilendigini buýsanç bilen bellemek bolar.
Halklaryň arasynda dost-doganlygy, hoşniýetli goňşuçylygy has-da pugtalandyrmak, bedenterbiýäni we sporty wagyz etmek, jemgyýetde sagdyn durmuş ýörelgelerini işjeň ornaşdyrmak, ösüp gelýän ýaş nesli sport bilen meşgullanmaga giňden çekmek, ýurdumyzyň halkara sport abraýyny mundan beýläk-de belende götermek maksady bilen, hormatly Prezidentimiziň şu ýylyň 15 — 20-nji apreli aralygynda Aşgabat şäherindäki Gyşky oýunlar sport toplumynda hokkeý boýunça halkara ýaryşy geçirmek hakynda Karara gol çekmegi «Pähim-paýhas ummany Magtymguly Pyragy» ýylynda eziz Diýarymyzyň dünýä derejesinde sport abraýynyň has-da belende galýandygynyň nobatdaky güwäsidir.
Türkmenistanyň, Belarus, Türkiýe, Gazagystan, Gyrgyz, Özbegistan Respublikalarynyň, Russiýa Federasiýasynyň Tatarystan Respublikasynyň, Oman Patyşalygynyň, Bahreýn Patyşalygynyň, Eýran Yslam Respublikasynyň öňdebaryjy hokkeý toparlarynyň gatnaşmagynda şu gün badalga alýan bu halkara sport ýaryşy Watanymyzyň syýahatçylygyny ösdürmekde we mahabatlandyrmakda hem uly ähmiýete eýe bolar.
Hawa, bu gün hokkeý hem ýaşlaryň köpçülikleýin saýlap alýan sport görnüşleriniň birine öwrüldi. Ýetginjekler toparymyz 4 — 7-nji mart aralygynda Keýptaun şäherinde Gonkongyň, Tailandyň we GAR-nyň toparlarynyň gatnaşmagynda «B» toparyň üçünji diwizionynyň dünýä çempionatynda çykyş edip, kümüş medala mynasyp boldy. Geçen ýyl Türkmenistanyň ýetginjekler topary Özbegistanyň, Mongoliýanyň, BAE-niň, Tailandyň we Eýranyň toparlarynyň gatnaşmagynda Ulan-Batorda 18 ýaşa çenli oýunçylaryň arasynda geçirilen ilkinji Aziýa we Okeaniýa çempionatynda kümüş medal eýeledi.
Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň tagallasy bilen, Diýarymyzda sport ulgamy has-da kämilleşýär. Sportuň ýurdumyz üçin täze bolan: buzda figuralaýyn typmak, tans sporty, hokkeý ýaly görnüşleri rowaçlanýar.
Gahryman Arkadagymyzyň tagallasy bilen, geçen ýyllaryň dowamynda ýurdumyzda Gyşky sport toplumy, Milli olimpiýa sport toplumy ýaly gyşky oýunlar üçin niýetlenilen desgalar gurlup ulanylmaga berildi. Munuň özi buzly meýdançalarda oýnalýan oýunlar bilen bir hatarda, hokkeý sportunyň hem döremegine möhüm maddy-enjamlaýyn binýat bolup hyzmat etdi. Sportuň bu görnüşi bilen 7 — 13 ýaşly oýunçylar kiçi toparlara, 14 — 16 ýaşa çenli oýunçylar ýetginjekler toparyna, şondan ýokary ýaşdaky oýunçylar ulular toparyna degişli edilýär.
2011-nji ýylda paýtagtymyzda «Oguzhan», «Alp Arslan», «Şir», «Bürgüt» hokkeý toparlary, şeýle hem Türkmenistanyň hokkeý ýygyndy topary döredildi.
Goý, Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak, işleri rowaç bolsun!