Türkmenistanyň Söwda-senagat edarasynda Eýran Yslam Respublikasynyň Demirgazyk Horasan welaýatynyň işewür wekiliýeti bilen duşuşyk geçirildi. Duşuşykda işewür hyzmatdaşlygy has-da ýygjamlaşdyrmak babatda anyk teklipler ara alnyp maslahatlaşyldy.
Demirgazyk Horasan welaýatynyň işewür wekiliýeti 2025-nji ýylyň maýynda Eýran Yslam Respublikasynyň Gürgen şäherinde Türkmenistanda öndürilen harytlaryň sergisiniň ýokary derejede geçirilendigini bellediler. Şeýle hem myhmanlar Bojnurd şäherinde sergi geçirmek üçin ähli mümkinçilikleriň döredilendigini, Türkmenistanda öndürilen harytlaryň sergisini geçirmek üçin Bojnurd şäheriniň geografik ýerleşişiniň hem logistika tarapdan amatly boljakdygyny nygtadylar.
Duşuşykda eksport, import amallary, online, offline görnüşdäki iş meýdançalary döretmek we önüm öndürijileriň maglumatlaryny ýerleşdirmek baradaky tekliplere hem garaldy.
Taraplar iki ýurduň söwda-yksady işewür hyzmatdaşlygynyň geljekde hem sazlaşykly ösdüriljekdigine ynam bildirip, bu ugurda alnyp barylýan ähmiýetli işlerde üstünlikleri arzuw etdiler.