2024-nji ýylyň 30-njy noýabrynda Hytaýyň Siçuan welaýatynyň Çengdu şäherinde “Merkezi Aziýa – Hytaý” formatyndaky daşary işler ministrleriniň bäşinji duşuşygynyň çäginde Türkmenistanyň daşary işler ministri Raşid Meredow bilen Hytaý Halk Respublikasynyň daşary işler ministri Wan Iniň arasynda duşuşyk geçirildi.
Duşuşykda daşary syýasat edarasynyň ýolbaşçylary özara bähbitli hyzmatdaşlygyň ýörelgelerine esaslanan döwletara gatnaşyklarynyň netijeli häsiýetini kanagatlanma bilen bellediler. Şunuň bilen baglylykda taraplar ozal gazanylan ikitaraplaýyn ylalaşyklaryň ýerine ýetirilişini ara alyp maslahatlaşdylar.
Bu duşuşygyň hemmetaraplaýyn strategiki häsiýete eýe bolan türkmen-hytaý dostluk gatnaşyklarynyň häzirki ýagdaýy barada pikir alyşmak üçin amatly pursatdygy bellenildi. Ministrler türkmen-hytaý hökümetara hyzmatdaşlyk komitetiniň döwletara hyzmatdaşlygyň täsirli mehanizmidigini aýtdylar.
Diplomatlar şeýle hem halkara we sebit guramalarynyň çäginde Türkmenistan bilen Hytaýyň arasyndaky köptaraplaýyn gatnaşyklarynyň netijelidigini bellediler. “Merkezi Aziýa – Hytaý” formatynyň netijeliligi nygtaldy.
Şu nukdaýnazardan, taraplar 2025-nji ýylda Astana şäherinde geçiriljek “Merkezi Aziýa – Hytaý” döwlet Baştutanlarynyň ikinji sammitine taýýarlyk meselesini ara alyp maslahatlaşdylar.
Daşary syýasat edaralarynyň ýolbaşçylary söwda we ykdysady ugurda netijeli hyzmatdaşlygy bellediler, energiýa, ulag we aragatnaşyk, medeni we ynsanperwer ugurlar boýunça bilelikdäki işlere baha berdiler.
Duşuşykdan soň Türkmenistanyň Daşary işler ministrligi bilen Hytaý Halk Respublikasynyň Daşary işler ministrliginiň arasynda 2025-2026-njy ýyllar üçin hyzmatdaşlyk ähtnamasyna gol çekildi.