Türkmenistanyň agyr atletika boýunça milli ýygyndysy şu günler Gazagystanyň Şymkent şäherinde Parižde geçiriljek tomusky Olimpiýa oýunlarynyň saýlama ýaryşlaryna gatnaşmak üçin okuw-türgenleşik ýygnanyşygyny geçirýär. Ýeri gelende aýtsak, türkmen agyr atletikaçylary Pariž olimpiadasynyň saýlama tapgyryna girýän ýaryşlaryň birnäçesine geçen ýylda hem gatnaşdylar. Türgenlerimiziň käbiri bolsa bu oýunlarda çykyş etmäge has ýakyn geldi. Bu barada “Türkmenistan” gazeti habar berýär.
Ýeri gelende bellesek, milli ýygyndynyň tälimçiler düzümi Şymkentdäki okuw-türgenleşik ýygnanyşygyna türgenleriň 12-sini alyp gitdi. Türkmen agyr atletikaçylaryna iri halkara ýaryşlaryň ikisi garaşýar. Olaryň biri fewral aýynda Özbegistanda geçiriljek Aziýanyň çempionaty bolsa, ikinjisi aprel aýynda Tailandda guraljak dünýä çempionatydyr.
Agyr atletikaçylarymyz Gazagystanda 2-nji fewrala çenli türgenleşerler.