2024-nji ýylyň 9–12-nji dekabry aralygynda Türkmenistanyň Daşary işler ministrliginiň Halkara gatnaşyklary institutynyň mugallymlary we talyplary üçin Birleşen Arap Emirlikleriniň Türkmenistandaky Ilçihanasy tarapyndan Anwar Gargaş adyndaky Diplomatik Akademiýasynda “Halkara aragatnaşyklar: BAE-niň syýasaty, medeniýeti we ykdysady ugurlary” boýunça diplomatik okuw maksatnamasynyň çäklerinde okuw sapaklary guraldy.
Olaryň dowamynda hünärmenler Türkmenistanyň we Birleşen Arap Emirlikleriniň arasyndaky syýasy gatnaşyklar, BAE-niň alyp barýan daşary syýasatynyň esasy ugurlary, howanyň üýtgemegi, şeýle-de BAE-niň medeni we ykdysady mümkinçilikleri boýunça gürrüň berdiler.
Okuw sapagynyň birinji güni Halypa diplomatlaryň geňeşiniň başlygy hormatly Doktor Saýid Al Şamsi BAE-niň taryhy we medeniýeti barada sapak berdi. Ikinji gün Akademiýanyň ylmy işgäri Mustafa Baýumi howanyň üýtgemegi we diplomatiýa — COP-28 netijeleri barada çykyş etdi. Üçünji gün Ýakyn Gündogaryň syýasaty bölüminiň ýolbaşçysy Obaýd Al Dhanhani BAE-niň daşary syýasaty barada gürrüň berdi. Soňky gün AGDA-nyň uly ylmy işgäri doktor Sara Çeheb BAE-niň ykdysadyýeti boýunça gürrüň berdi.
Mundan başga-da, Abu-Dabiniň taryhy ýerlerine we muzeýlerine guralan gezelençler gatnaşyjylara BAE-niň medeni dürlüligini içgin öwrenmäge mümkinçilik berdi. Abu-Dabiniň Luwr muzeýi, Kasr Al Watan Prezident köşgi we Kasr Al Hosn ýaly taryhy desgalara edilen saparlar gatnaşyjylaryň arasynda uly täsir galdyrdy. Bu desgalaryň her biri BAE-niň döwlet gurluşynda we baý medeniýetinde möhüm orny eýeleýär.
Şeýle hem talyplar Abu-Dabiniň Milli Nebit Kompaniýasynyň (ADNOC) işi bilen tanyşmak üçin Ahmed Al-Haýa Hamad Hamis Al-Hameliň ýolbaşçylygyndaky topar bilen duşuşdylar. Şeýle-de olar Türkmenistanyň we BAE-niň söwda gatnaşyklary we maýa goýum mümkinçilikleri barada giňişleýin maglumat aldylar.