Golaýda wezipesine girişen ABŞ-nyň Prezidenti Donald Tramp öz ýurdunda “Stargate” atly kompaniýa döredilip, bu kompaniýanyň emeli intellekt üçin 500 milliard dollar maýa goýumlaryny gönükdirjekdigini habar berdi.
Bu barada Prezident Tramp “OpenAI” kompaniýasynyň baş direktory Sam Altmanyň, “Oracle” kompaniýasynyň esaslandyryjy Larri Ellisonyň hem-de “SoftBank Group” kompaniýasynyň müdiriýetiniň başlygy Masaýoşi Sonuň gatnaşmagynda Ak Tamda geçirilen metbugat ýygnagynda mälim etdi.
ABŞ-nyň Prezidentiniň belleýşi ýaly, täze dörediljek “Stargate” kompaniýasy taslamasyna “OpenAI”, “SoftBank Group” we “Oracle” ýaly kompaniýalar goşular.
– Bu dünýäniň öňdebaryjy tehnologiýa ägirtleri “Stargate” kompaniýasyny döretmegi yglan ederler. Muny bir ýere belläp goýup, sebäbi mundan soňra köp eşidersiňiz. Bu täze amerikan kompaniýasy bolup, Amerikanyň Birleşen Ştatlarynda emeli intellekt üçin azyndan 500 milliard dollar maýa goýumlaryny gönükdirerler – diýip, Tramp belledi.
Şeýle hem Trampyň belläp geçişi ýaly, bu taslama 100 müň täze iş orunlarynyň döredilmegine mümkinçilik berer.