ABŞ-ly işewür Ilon Mask özüniň ýolbaşçylygyndaky kompaniýa tarapyndan öndürilýän “Tesla” ulaglaryny bitkoin bilen hem alnyp boljakdygyny mälim etdi. Ol özüniň “Twitter” jemgyýetçilik torundaky hasabyndan ulaglary sanly pul bilen almak mümkinçiliginiň döredilendigini belledi. Häzirki wagtda bu töleg ulgamy diňe ABŞ-nyň çäklerinde amala aşyrylar. Soňlugy bilen dünýäniň beýleki ýurtlarynda hem elýeterli etmek meýilleşdirilýär.
Ilon Maskyň aýtmagyna görä, amerikaly awtoulag öndürijisi içerki programma üpjünçiligi bilen bitkoin töleglerini almak mümkinçiligine eýedir. “Teslany” satyn almak üçin tölenen bitkoin sanly pullar bitkoin hökmünde saklanar.
Mälim bolşy ýaly, 2021-nji ýylyň 8-nji fewralyndan “Tesla” kompaniýasy uzak möhletleýin sanly aktiwlere maýa goýup başlapdy. Şonda kompaniýanyň bu amallary bitkoiniň hümmetiniň ýokarlanmagyna sebäp bolupdy.
“Tesla” kompaniýasy ýanwar aýynda täzelenen “Model S” we “Model X” ulaglaryny hödürläpdi. Şereket häzirki wagtda arzan bahaly ulagyň öndürmegiň üstünde işleýär.