Ministrler Kabinetiniň Başlygynyň orunbasary N. Atagulyýew söwda toplumynda Halkara Bitaraplyk güni hem-de Täze ýyl baýramçylygyna görülýän taýýarlyk barada hasabat berdi. Bu barada “Watan” habarlar gepleşigi habar berýär.
Bellenilişi ýaly, baýramçylyk söwdalaryny şu ýylyň 5-nji dekabrda başlap, ýurdumyzyň welaýatlarynda hem-de Aşgabat we Arkadag şäherlerinde ýerleşýän bazarlarda we söwda merkezlerinde geçirmek, şeýle hem ýurdumyz boýunça jemi 850-den gowrak söwda nokatlaryny guramak göz öňünde tutulýar.
Şunuň bilen baglylykda, döwlet Baştutanymyzyň garamagyna degişli teklip hödürlendi.
Hormatly Prezidentimiz hasabaty diňläp, Halkara Bitaraplyk güni hem-de Täze ýyl baýramy baglylykda bazarlarda ilatyň dürli önümlerine bolan isleglerini doly kanagatlandyrmak üçin degişli çäreleri görmegiň, göçme söwda nokatlaryny gurnamagyň, bazarlary we dükanlary azyk, şol sanda gök-bakja we miwe önümleri bilen ýeterlik üpjün etmegiň möhümdigini belledi.
Döwlet Baştutanymyz bu babatda wise-premýere degişli tabşyryklary berdi.