Türkmenbaşydaky nebiti gaýtadan işleýän zawodlar toplumynyň (TNGZT) önümçilik we logistika düzümini giňeltmegiň çäklerinde,«Kenar» kärhanasynyň nebit we nebit önümlerini kabul etmek, saklamak hem-de ibermek üçin niýetlenen täze 3-nji belgili gämiler duralgasy ulanmaga berildi.
Täze desganyň geçirijilik ukyby ýylda 2 million tonnadan gowrak ýüklemek üçin, 1 million tonnadan gowrak nebit önümlerini düşürmek üçin ýetýär.
Desga häzirki zaman awtomatlaşdyrylan tehnika, howpsuzlyk we ýangyna garşy gorag ulgamlary bilen enjamlaşdyrylandyr. Bu bolsa işiň ýokary ygtybarlylygyny we netijeliligini üpjün edýär. Täze duralga eksport ugurlaryny diwersifikasiýa etmekde we Türkmenistanyň dünýä energiýa bazaryndaky ornuny berkitmekde möhüm ähmiýete eýedir.
TNGIZT halkara standartlaryna laýyk gelýän önümleriň giň toplumyny, şol sanda dürli kysymly benzinleri, awiasiýa we dizel ýangyjyny, çalgy ýaglaryny hem-de polipropileni öndürýär.
2025-nji ýylyň netijeleri kärhananyň durnukly ösýändigini görkezýär. Geçen döwürde nebit gaýtadan işlemegiň möçberi 4,5 million tonnadan gowrak boldy. Benzin önümçiligi: 1 million tonnadan gowrak ýokary hilli benzin öndürildi.
Bellenen görkezijiler 6,7 göterim artygy bilen berjaý edildi.
«Kenar» duralgasynyň işe girizilmegi önümçiligiň möçberlerini has-da artdyrmaga hem-de nebit önümlerini içerki we daşarky bazarlara durnukly ibermäge goşmaça mümkinçilikleri döredýär.