Şu ýylyň 8 — 10-njy sentýabry aralygynda Özbegistan Respublikasynyň Daşkent şäherinde geçirilen sportuň Şotokan karate görnüşi boýunça 13-nji dünýä çempionatynda Türkmenistanyň milli ýygyndy topary üstünlikli çykyş etdi.
Ulularyň, kadetleriň hem-de ýetginjekleriň arasynda guralan ýaryşlara 31 ýurtdan 1500-e golaý türgen gatnaşdy. Türkmenistanyň ýygyndy toparyna 64 karateçi wekilçilik etdi. Bu ýerde türkmen türgenleriniň ählisiniň diýen ýaly medallara eýe bolmagy başarandyklary aýratyn buýsandyryjy ýagdaýdyr.
Umuman, türkmenistanly karateçiler dürli medallaryň 72-sine eýe boldular. Şolaryň 13-si altyn, 20-si kümüş, galan 39-sy bolsa bürünç medallardyr. Türkmen ýygyndysy toparlaýyn hasap boýunça hem dünýäniň iň güýçli bäşligine girmegiň hötdesinden geldi.