Gahryman Arkadagymyzyň beýik işlerini mynasyp dowam etdirýän Arkadagly Gahryman Serdarymyzyň taýsyz tagallalary bilen halkymyzyň saglygy we abadançylygy ähli zatdan ileri tutulyp, her bir raýatyň saglyk goraglylygyny berkitmek, ömür dowamlylygyny uzaltmak, jemgyýetde sagdyn durmuş ýörelgelerini pugtalandyrmak babatda eziz Diýarymyzda giň gerimli işler üstünlikli amala aşyrylýar.
Berkarar döwletiň täze eýýamynyň Galkynyşy döwrüniň «Pähim-paýhas ummany Magtymguly Pyragy» ýylynda hem ýurdumyzda köpçülikleýin bedenterbiýäni we sporty ösdürmek, jemgyýete sagdyn durmuş ýörelgesini ornaşdyrmak, maksada okgunly, sagdyn ýaşlary terbiýeläp ýetişdirmek baradaky işlere aýratyn üns berilýär. Şol işleriň üstünliklere beslenmeginiň netijesinde eziz Diýarymyz sagdynlygyň hem ruhubelentligiň ýurduna öwrüldi.
Ýurdumyzda sagdyn jemgyýeti berkarar etmek, raýatlaryň işjeň durmuşyny üpjün etmek we daşky gurşawa aýawly garamak meselelerine aýratyn ähmiýet berilýär. Bu ugurdaky işleriň ählisi Gahryman Arkadagymyzyň ýurdumyzda ynsan saglygyny goramak we raýatlaryň ömür dowamlylygyny uzaltmak ugrundaky başlangyçlaryndan gözbaş alýar. Ýurdumyzda köpçülikleýin bedenterbiýe hereketleriniň, pyýada, welosipedli ýörişleriň, sport ýaryşlarynyň yzygiderli geçirilmegi halkyň saglygyny we bagtyýarlygyny goramaga, beden we ruhy taýdan kämil nesli terbiýeläp ýetişdirmäge giň mümkinçilikleri açýar.
Hormatly Prezidentimiz saglygy goraýyş ulgamyny hemmetaraplaýyn ösdürmäge aýratyn uly üns berýär. Şol sebäpden häzirki wagtda bu ulgamda uly öňegidişlikler, üstünlikler gazanyldy. Lukmançylykda dünýä tejribesiniň öňdebaryjy tehnologiýalaryny we usullaryny ulanmak arkaly ilata edilýän saglygy goraýyş hyzmatlarynyň hili has-da ýokarlandy.
Ýurdumyzyň ähli ýerinde bolşy ýaly, welaýatymyzda hem saglygy goraýyş ulgamynda alnyp barylýan işler düýpli özgerdi. Welaýat merkezimizde sebitde deňi-taýy bolmadyk köpugurly hassahana ildeşlerimize ýokary hilli lukmançylyk hyzmatlaryny berýär. Bu saglyk merkezinden başga-da welaýatymyzda ýokanç keseller hassahanasy, Enäniň we çaganyň saglygyny goraýyş, «Ene mähri», Gaýragoýulmasyz «Tiz kömek» ýaly merkezler hem ilata döwrebap şertlerde ýokary derejede hyzmat edýär. Welaýatymyzyň saglygy goraýyş edaralarynda gurluşyk we abatlaýyş işleri yzygiderli alnyp barylýar.
Ýurdumyzyň «Saglyk» Döwlet maksatnamasyna laýyklykda, saglygy goraýyş ulgamynda kanunçylyk namalaryň, milli we döwlet maksatnamalaryň tutuş toplumynyň kabul edilmegi-de aýratyn bellärliklidir. Döwrüň talaplaryna we BSGG-niň maslahatlaryna laýyklykda kabul edilen «Türkmenistanda ýokanç däl keselleriň öňüni almak we olaryň garşysyna göreşmek boýunça 2021 — 2025-nji ýyllar üçin Milli strategiýasy», «Türkmenistanda ilatyň kesellere garşy göreşmek ukybyny ýokarlandyrmak boýunça 2021 — 2025-nji ýyllar üçin Milli maksatnamasy», «2021 — 2025-nji ýyllar üçin «Sagdyn ene — sagdyn çaga — sagdyn geljek» atly Milli strategiýasy», «Türkmenistany temmäkiden azat ýurda öwürmek boýunça 2022 — 2025-nji ýyllar üçin Milli maksatnamasy», «Türkmenistanda D witamini bilen bagly öňüni alyş çärelerini ýokarlandyrmak boýunça 2023 — 2028-nji ýyllar üçin Strategiýasy» hem-de «Türkmenistanda ilatyň saglyk abadançylygyny üpjün etmek boýunça 2023 — 2028-nji ýyllar üçin Milli maksatnamasy» ilatyň ruhy we beden taýdan sagdynlygyny gazanmak, raýatlaryň saglyk ýagdaýyny has-da gowulandyrmak, abadançylygyny ýokarlandyrmak, adam ömrüniň dowamlylygyny artdyrmak ýaly asylly ýörelgelerden gözbaş alýar.
«Pähim-paýhas ummany Magtymguly Pyragy» şygary astynda geçýän 2024-nji ýylda hem möhüm ähmiýetli desgalaryň ençemesi ulanmaga berler. Şolaryň hatarynda Halkara sagaldyş-dikeldiş hem-de Halkara fiziologiýa ylmy-kliniki merkezleriniň hem bolmagy Türkmenistanda saglygy goraýyş ulgamyny ösdürmäge döwlet derejesinde uly ähmiýet berilýändiginiň nobatdaky subutnamasydyr.
«Türkmenistanda ilatyň saglyk abadançylygyny üpjün etmek boýunça 2023 — 2028-nji ýyllar üçin Milli maksatnamanyň» kabul edilmegi hormatly Prezidentimiziň «Watan diňe halky bilen Watandyr! Döwlet diňe halky bilen döwletdir!» diýen baş ýörelgesiniň rowaçlyklara beslenýändiginiň nobatdaky subutnamasy bolup dabaralandy. Sagdyn durmuş ýörelgesiniň, köpçülikleýin bedenterbiýäniň, sportuň jemgyýetimiziň ähli ugurlarynda ýaýbaňlanmagy üçin ajaýyp şert-mümkinçilikleri döredýän hormatly Prezidentimize alkyşlar bu günki gün bagtyýar raýatlarymyzyň dilleriniň senasydyr.