Gyrgyz Respublikasynyň Prezidenti Sadyr Žaparow Türkmenistanyň hemişelik Bitaraplygynyň 30 ýyllygyna bagyşlanan halkara forumda çykyş etdi. Ol Türkmenistanyň Prezidenti Serdar Berdimuhamedowa mähirli kabul edendigi we çäräni ýokary derejede gurandygy üçin hoşallyk bildirdi.
Gyrgyzystanyň Baştutany Bitaraplyk syýasatynyň Türkmenistanyň durnukly ösüşiniň binýady bolup, ýurduň içerki durnuklylygyny, ykdysadyýetiniň döwrebaplaşdyrylmagyny we halkara abraýynyň güýçlenmegini üpjün edendigini nygtady.
Ol Türkmenistanyň sebitiň energetika howpsuzlygynyň we ulag-logistika düzüminiň ösüşine goşan ähmiýetli goşandyny belläp, elektrik energetika pudagynda üstünlikli hyzmatdaşlygyň we tranzit ugurlaryny ösdürmegiň wajyplygyny nygtady.
Sadyr Žaparow Türkmenistanyň 2025-nji ýyly Halkara parahatçylyk we ynanyşmak ýyly diýip yglan etmek baradaky başlangyjyny aýratyn belledi, ony Gyrgyzystan işjeň goldady we bilelikde awtordaşy boldy. Ol, şeýle hem, Türkmenistanyň Merkezi Aziýada dialogy öňe sürmekdäki, şol sanda halkara maslahatlaryny geçirmek we sebitiň döwlet Baştutanlarynyň Konsultatiw duşuşyklaryna gatnaşmakdaky roluna ýokary baha berdi.
Çykyşyny jemläp, Gyrgyzystanyň Prezidenti Türkmenistanyň tejribesiniň parahatçylygy, hoşniýetli goňşuçylygy we durnukly ösüşi üstünlikli öňe sürmegiň nusgasy bolup hyzmat edýändigini, Gyrgyzystanyň bolsa Merkezi Aziýada durnuklylygy we hyzmatdaşlygy berkitmek boýunça tagallalara mundan beýläk hem gatnaşmaga taýýardygyny nygtady.