Ertir Russiýanyň Prezidenti Wladimir Putin Gazagystana resmi sapar bilen barar. Bu saparynyň öňüsyrasynda Gazagystanyň “Gazagystan prawda” gazetine beren söhbetdeşliginde Wladimir Putin Gazagystanyň ykdysadyýetine goýlan maýa goýumyň möçberiniň 17 milliard dollara barabar bolandygyny belledi.
Rus Lideri iki ýurduň arasyndaky özara söwda dolanyşygynyň okgunly ösüşine ýokary baha berdi. Geçen ýyl bu görkeziji 10,2 göterim artyp, 28.2 milliard dollara deň boldy. Şu ýylyň ýanwar-awgust aýlarynda bolsa, söwda dolanyşygy 7.6 göterim ýokarlanyp, 18.9 milliard dollara ýetdi.
Wladimir Putiniň belleýşi ýaly, Russiýa gazak ykdysadyýetine iň köp maýa goýan ýurtlaryň biridir. Rus maýa goýumynyň möçberi 17 milliard dollara barabar boldy. Gazagystanda rus tarapynyň gatnaşmagynda 6 müň kärhana hereket edýär.
Şeýle hem Putin energetika pudagyndaky hyzmatdaşlyk gatnaşyklary barada hem durup geçip, Gazagystanyň demirgazyk we gündogar sebitlerini gazlaşdyrmak işine kömek etmäge taýýardygyny belläp, muny “Gazprom” kompaniýasy bilen Gazagystanyň hökümetiniň arasynda şu ýylyň ýanwarynda gol çekilen tebigy gaz pudagynda hyzmatdaşlyk boýunça “Ýol kartasy” esasynda ýerine ýetirip boljakdygyny belledi.