Angliýanyň “Mançester Ýunaýted” toparynyň hüjümçisi Kristiano Ronaldo Çempionlar ligasynyň toparçadaky duşuşyklarynda Italiýanyň “Atalanta” (3: 2) toparynyň derwezesinde bir pökgi geçirip, bu ýaryşdaky täze rekordyny goýdy. Bu barada “Squawka” neşiri habar berýär.
Portugaliýaly hüjümçi Çempionlar ligasynda rekord goýup, 38 toparyň derwezesinden pökgi geçirdi. Ronaldonyň bu görkezijide “PSG” toparynyň argentinaly hüjümçisi Lionel Messiden öňe geçendigi bellendi. Messiniň 37 toparyň derwezesine gol geçirendigi mälim edilýär.
Mälim bolşy ýaly, sentýabr aýynda Ronaldo Ginnesiň rekordlar kitabyna girdi. Ol 2022-nji ýyldaky dünýä çempionatynyň saýlama tapgyrynyň çäginde Irlandiýa bilen oýunda (2:1) iki pökgi geçirip, milli ýygyndy üçin geçiren gollarynyň rekordyny täzeledi. Şol döwürde futbolçynyň milli ýygyndy üçin 111 pökgüsi bolup, ol bu görkezijisi bilen Ginnesiň kitabyna girizildi.