Hytaýyň paýtagty Pekin şäherinde XXIV gyşky Olimpiýa oýunlarynyň açylyş dabarasy geçirildi. Pekindäki Milli stadionynda, başgaça aýdylanda “Guş höwürtgesi” diýlip atlandyrylýan stadionda Olimpiýa oýunlarynyň alawy ýakyldy we halkara derejesindäki ýaryş resmi taýdan başlady.
Açylyş dabarasyna Hytaýda iş saparynda bolýan Türkmenistanyň Prezidenti hem gatnaşdy. Şeýle hem açylyş dabarasyna HHR-iň Başlygy Si Szinpiniň çakylygy boýunça Argentinanyň, Müsüriň, Gyrgyzystanyň, Polşanyň, Russiýanyň, Singapuryň, Serbiýanyň, Täjigistanyň, Özbegistanyň, Ekwadoryň Prezidenti, Kataryň Emiri, Bosniýa we Gersegowina, Gresiýa, Mongoliýa, Pakistanyň Premýer-ministri, Kamboja şasy, Saud Arabystanynyň mirasdüşer şazadasy, Abu Dabiniň mirasdüşer şazadasy, Monakonyň şazadasy, Lýuksemburgyň gersogy, Taýlandyň şazadasy, BMG-nyň Baş sekretary, Halkara olimpiýa komitetiniň başlygy, BSGG-nyň baş direktory, ŞHG-nyň Baş sekretary we başga-da birnäçe daşary ýurtly ýolbaşçylar gatnaşdy.
Umuman, bu ýaryşa 91 döwletden türgenler gatnaşýar. Olar 4-20-nji fewral aralygynda sportuň birnäçe ugry boýunça 109 medal toplumyny almak ugrunda bäsleşerler.
