Tamamlanyp barýan ýylda tehnologiýa dünýäsinde hem köp sanly özgermeler, täzelenmeler boldy. Olaryň aglabasyna biz saýtymyzyň habarlarynda hem orun berdik. Şol bir wagtyň özünde 2019-njy ýylda käbir tehnologik gurluşlar işlemegini bütinleý bes etdi. Eýsem, olar haýsylarka? Geliň, tanyş bolalyň!
AirPower
«Apple» kompaniýasynyň kabelsiz zarýadlandyrýan bu ulgamy 2017-nji ýylda işe girizilipdi. Hatda şol ýylyň mart aýynda ol «Apple Store» onlaýn dükanyndan hem özüne orun tapdy. Şeýle-de bolsa, bu gurluş garaşylan netijäni bermedi. 2019-njy ýylda bolsa korporasiýa ony öndürmegi düýbünden togtatdy.
iTunes
Bize 18 ýylyň dowamynda «iPhonelarymyzda» aýdym-saz diňlemäge ýardam beren gurluş hem 2019-njy ýylda taryha girdi. Bu gurluş «Apple» kompaniýasy tarapyndan öndürilen kompýuterlerde hem bardy. Indi bolsa ol sanlyja tehnologiýalarda galdy. Elbetde, «iTunes» ornuny has kämil gurluşlara bermeli boldy.
Coolest Cooler
Ýadyňyzda bolsa, bu tehnologik 2014-nji ýylda 13 million dollar girdeji getirip, öz döwrüniň rekordyny goýupdy. «Coolest Cooler», aslynda, portatiw sowadyjy bolup, tehnologik gurluşlaryň ençemesinde ornaşdyryldy. Ýöne barha kämilleşýän tehnologiýa «rekordçyny» hem taryha ýollady.
3D Touch
«Apple» smartfonlaryndaky iň täsin, ýöne ýeterlik gyzyklanma toplap bilmedik aýratynlyklaryň biri hem «3D Touch» bolupdy. Ol ilkinji gezek «iPhone 6s» modelinde peýda bolupdy. Şondan soň biz bu gurluş bilen «iPhone XS-de» hem ýüzbe-ýüz bolduk. 2019-njy ýylda öndürilen «iPhone XR»-de bolsa korporasiýa bu aýratynlykdan ýüz öwürdi.
Google+
Bir döwürde hemmeler tarapyndan ulanylan «Google+» 2011-nji ýylda «Google Buzzyň» ornuna döredilipdi. Geçen ýyllaryň dowamynda birnäçe täzelenmeler bilen tehnologiýa dünýäsinde galmaga çalşan bu gurluşyň güýji ahyrsoňy tükendi. Ol soň-soň özüni ödemedi we taryha siňenleriň arasyna goşuldy.
12 dýuýmlyk MacBook
«MacBookyň» bu görnüşi birnäçe kemçiliklerden halas bolmasa-da, köpçülik ony halady. 2015-nji ýylda öndürilen bu noutbuk ozalky «kompaniýadaşlarynda» bolan aýratynlyklaryň köpüsinden mahrumdy. Aslynda, «Apple» ony hem kompýuter, hem planşet görnüşinde göz öňüne getiripdi, ýöne onuň peýdasy göz öňüne getirilişi ýaly hem galdy.
Windows 10 Mobile
«Windows 10» gurluşly smartfonlar 2016-njy ýyldan bäri öndürilmeýän bolsa-da, «Microsoft» barybir ony yzygiderli täzeledi. Ýakynda bolsa kompaniýa «Windows 10 Mobile» gurluşyny täzelemegi hem bes etdi.
Google Inbox
Bu hyzmat «Google» kompaniýasynyň poçta hyzmaty bolup, onuň «Gmailiň» hem ýerini tutmagyna garaşylýardy. Ýöne ol ulanyjylaryň göwnünden turmady. Şeýlelikde, hemmeler ýene-de «Gmaile» hüjüm etdi. «Google Inbox» bolsa gelen ýerine gitmek bilen boldy.