Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Özbegistan Respublikasynyň Prezidentiniň kömekçisi Saida Mirziýoýewa bilen bilelikde «Inson» jemgyýetçilik hyzmatlar merkezine we Samarkant şäherindäki inklýuziw bilim merkezine baryp gördi. Bu barada yuz.uz saýty habar berdi.
Hormatly myhmanlar ilatyň jemgyýetçilik goragyna mätäç toparlaryny goldamak, bilim almak mümkinçiliginden deň peýdalanmak üçin döredilýän şertler bilen tanyşdylar.
– Doganlyk Türkmenistan döwletinden hormatly Oguljahan Atabaýewany Özbegistanda görmekden örän şatdyryn. Biz «Inson» jemgyýetçilik hyzmatlar merkezine we Samarkant şäherindäki inklýuziw bilim merkezine baryp gördük. Bu ýerde ilatyň howandarlyga mätäç derejedäki adamlara berilýän goldawlar hem-de bilim elýeterligi üçin döredilýän şertler bilen tanyşdyk.
Bu duşuşygymyzyň çagalara we maşgalalara goldaw bermek babatda bilelikdäki başlangyçlary ösdürmek babatda oňat binýat boljakdygyna berk ynanýaryn – diýip, Özbegistan Respublikasynyň Prezidentiniň kömekçisi Saida Mirziýoýewa özüniň “Telegram” jemgyýetçilik tory arkaly habar berdi.