Germaniýa Federatiw Respublikasynyň ozalky diýlip boljak kansleri Angela Merkeliň 16 ýyllyk döwri tamamlandy. Ýurduň Prezidenti Frank-Walter Ştaýnmaýer kansler Angela Merkel we onuň Ministrler Kabinetiniň agzalaryna resmi rugsat şahadatnamasyny gowşurdy.
Merkel we onuň hökümet agzalary Germaniýanyň täze hökümeti düzülýänçe wagtlaýynça işlerini dowam ederler.
Germaniýa Federatiw Respublikasynyň Prezidenti Frank-Walter Ştaýnmaýer Merkeliň döwründe uly işleriň bitirilendigini, soňky 4 ýylda 600 kanunyň kabul edilendigini belledi.
1954-nji ýylyň 17-nji iýulynda Germaniýanyň Gamburg şäherinde dünýä inen Angela Merkel 1973-1978-nji ýyllarda Leýpsig uniwersitetinde fizika ugry boýunça bilim aldy.
1986-njy ýylda kanditatlyk dissertasiýasyny gorandan soňra fizika ugruny syýasata öwürdi. 1990-njy ýylda Germaniýa birleşenden soňra Merkel 36 ýaşynda HDS partiýasynyň agzasy boldy. Soňra ýurduň mejlisi bolan Bundestaga saýlandy. Bu partiýanyň içnde birnäçe wezipelerde işläp, 2000-nji ýylda partiýanyň ýolbaşçysy boldy.
Kansler Gelmut Koluň hökümetinde 1991-1994-nji ýyllarda zenanlar we ýaşlar boýunça ministr wezipesini amala aşyrdy. 1994-1998-nji ýyllarda daşky gurşaw, tebigaty goramak hem-de ýadro reaktorlaryň howpsuzlygy boýunça ministr wezipesini ýerie ýetirdi.
Ol 2005-nji ýylyň 22-nji noýabrynda Germaniýanyň 8-nji kanseleri boldy we 16 ýyl bu wezipede galdy.
Eger häzirki wagtda Germaniýada täze hökümet 17-nji dekabra çenli düzülmese, onda Merkel ýurduň hökümet baştutany wezipesini iň köp eýelän ýolbaşçy bolar we Gelmut Koluň rekordyny täzeler. Gelmut Kol 1982-nji ýylyň 1-nji oktýabryndan – 1998-nji ýylyň 26-njy oktýabryna çenli kansler wezipesinde işledi. Gelmut kol 2017-nji ýylda aradan çykdy.
Türkmenistan bilen Eýran demirýol ulgamyndaky hyzmatdaşlygyny ösdürýär