Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň “Daewoo Engineering & Сonstruсtion Сo., Ltd.” kompaniýasynyň esaslandyryjysy we müdiriýetiniň başlygy Jong Won-ju bilen geçiren duşuşygynda özara bähbitli hyzmatdaşlygy giňeltmegiň geljekki ugurlary ara alnyp maslahatlaşyldy. Bu barada Halk Maslahatynyň resmi saýtynda bellenilip geçilýär.
Türkmenistanyň Halk Maslahatynyň Başlygy Gurbanguly Berdimuhamedow dostlukly ýurduň Prezidenti Ýun Sok Ýola iň gowy arzuwlaryny aýdyp, Türkmenistanyň Koreýa Respublikasy bilen ýola goýulýan netijeli gatnaşyklara ýokary baha berýändigini aýtdy.
Şunda hyzmatdaşlyk birek-birege hormat goýmak, ynanyşmak we özara düşünişmek esasynda yzygiderli ösdürilýär. Ýurtlarymyz syýasy diplomatik, söwda-ykdysady we medeni-ynsanperwer ugurlarda işjeň hyzmatdaşlyk edýär.
Koreýanyň iri kompaniýalary türkmen bazarynyň ulag, gaz we himiýa senagaty ýaly möhüm ugurlarynda köp ýyllardan bäri üstünlikli işleýärler. Türkmenistana ýeňil ulaglar we belli “Hyundai” kysymly ýolagçy awtobuslary yzygiderli ugradylýar. Dürli ugurlarda bilelikdäki wajyp taslamalar durmuşa geçirilýär.
Ulag-logistik ugry boýunça gatnaşyklar ösüşiň täze derejesine çykýar. Halkara ýük daşamalarynyň iri üstaşyr geçelgesi hökmünde Türkmenbaşynyň Halkara deňiz menziliniň işini öňdebaryjy tejribä laýyklykda guramaga möhüm ähmiýet berilýär.