Eýran Yslam Respublikasynyň daşary işler ministri Mohammad Jawad Zarifiň Merkezi Aziýa ýurtlarynda saparda boljakdygy malim edildi. Bu barada Eýranyň “IRNA” habarlar gullugy habar berýär.
Eýranyň daşary syýasat edarasynyň resmi wekili Said Hatibzade daşary işler ministri Jawad Zarifiň 5-8-nji aprel aralygynda Merkezi Aziýa ýurtlarynda saparda boljakdygyny belläp geçdi. Onuň bu döwürde Merkezi Aziýanyň 4 döwletinde boljakdygy aýdylýar.
Said Hatibzade özüniň “Twitter” jemgyýetçilik sahypasynda bu barada beren beýanatynda, Merkezi Aziýa ýurtlary bilen gatnaşyklaryň ösdürilmeginiň Eýranyň esasy ileri tutýan ugurlarynyň biri bolandygyny belledi. Şonuň üçin ýurduň daşary işler ministri Özbegistanda, Gyrgyzystanda, Gazagystanda we Türkmenistanda saparda bolar.
Hatibzadeniň aýtmagyna görä, bu saparyň maksady ikitaraplaýyn hem-de sebit hyzmatdaşlygyny ösdürmekden ybaratdyr.