Futbol boýunça dünýä çempionatlary unudylmaýan köp sanly wakalara baý bolýar. Şolaryň biri hem 1986-njy ýylda Meksikada geçirilen dünýä çempionatydyr. Bu çempionat dünýä futbolynyň taryhynyň sahypalarynda müdimilik orun aldy. Bu waka düýn aradan çykan, futbolyň rowaýata öwrülen şahsyýeti, Argentinanyň milli ýygyndysynyň “10” belgili futbolçysy Diego Armando Maradona bilen baglanyşyklydyr.
1986-njy ýyldaky dünýä çempionaty ýertitremesi zerarly 30 müň adamyň pida bolan ýurdy bolan Meksika berildi. Şol ýyldaky dünýä çempionatyny gurnamaga hukuk gazanan Kolombiýadaky ykdysady kynçylyklar sebäpli dünýäniň iň abraýly ýaryşyny geçirmek hukugy Meksika berildi. Meksika 1970-nji ýyldan soňra ikinji gezek dünýä çempionatyna gujak açdy.
Bu çempionatda Günbatar Germaniýany 3:2 hasabynda ýeňmegi başaran Argentina çempion bolupdy. Bu çempionlyk Argentinanyň milli ýygyndysynyň 2-nji çempionlygy bolupdy.
MARADONANYŇ ÇEMPIONATY
Bu çempionat Diego Armando Maradonyň çempionaty boldy. Onuň şowly çykyşy Argentinanyň milli ýygyndysyna çempionlyk getiripdi. Maradona bu çempionatda 7 duşuşykda çykyş edip, 5 gezek tapawutlandy we ýygyndysynyň iň köp gol geçiren futbolçysy boldy.
“TAŇRYNYŇ ELI”
Meksikadaky dünýä çempionatynyň ýatda galan wakasy Maradonanyň Angliýanyň milli ýygyndysyna eli bilen geçirilen goly boldy. Çempionatyň ýarym finalynda Argentina bilen Angliýanyň ýygyndylary duşuşdy. Duşuşyk 2:1 hasabynda Argentinanyň ýeňşi bilen tamamlandy. Argentinanyň 2 goluny hem Maradona öz adyna ýazdyrdy.
Bu duşuşygy Azteka stadionynda 114 müň 580 janköýer tomaşa etdi. Maradona duşuşykda Angliýanyň derwezebany Şiltonyň goraýan derwezesinden goly eli bilen geçirdi. Duşuşygyň emini tunisli Ali Bennakuer goly hasap edip, meýdançanyň orta burçuny görkezdi. Iňlis futbolçylary garşy çykandygyna garamazdan, emin kararyny üýtgetmedi.
Maradona çempionatdan soňra söhbetdeşlikleriň birinde bu goly “Taňrynyň eli” diýip atlandyrdy.
Şeýle hem şol duşuşykda Maradonanyň meýdançanyň orta arasyndan pökgüni alyp, öňüne çykan ähli iňlis futbolçylaryny aldap geçip, geçiren goly hem bu çempionatyň hem-de dünýä futbolynyň iň gowy gollarynyň biri boldy.
Şol çempionatda janköýerleriň stadiondaky “Meksika tolkuny” hereketi, häzir hem futbol duşuşyklarynda ýygy-ýygydan duş gelinýär.
Interaktiw sahypamyz- okyjylarymyzdan gelen habar we eserleriň ýerleşdirilýän sahypasy-sizden gelenler sahypasy siziň iberjek eserleriňize garaşýar!
