Türkiýäniň Bursa şäherinde bilim alýan türkmen talyplary dostlukly ýurduň paýtagty Ankara şäherinde ýerleşýän “Türkmenistan” seýilgähine we bu şäheriň birnäçe ajaýyp ýerlerine syýahat gurnadylar. Bursadaky türkmenistanly talyplar bu seýilgähde ýerleşýän Magtymguly Pyragynyň ýadygärligine hem baryp gördüler. Bursa Uludag uniwersitetiniň çäginde hereket edýän Türkmenistan medeniýet we sungat klubynyň gurnan çäresine 40-dan gowrak talyp oglan we gyzlar gatnaşdy.
Ankara şäherine gurnalan bu gezelenç barada Bursa Uludag uniwersitetiniň çäginde hereket edýän Türkmenistan medeniýet we sungat klubynyň ýolbaşçysy Ogulnar Nurlyýewa saýtymyza beren beýanatynda şeýle diýdi :
– Biz türkmenistanly talyplar bolup ýurdumyzyň bize döredip berýän mümkinçiliklerinden netijeli peýdalanyp, daşary ýurtlarda bilim alýarys. Biz ilki bilen Watanymyza we milletimize peýdaly nesiller bolup ýetişjekdigmize ynandyrmak isleýäris. Şonda Türkiýe döwleti biziň üçin aýratyn bir ýurt bolup durýar. Bursa şäherinde bilim alýan türkmenistanly talyplar bolup beýleki ýurtlardan gelen talyplar ýaly biz hem Bursa Uludag uniwersitetinde Türkmenistan medeniýet we sungat klubyny esaslandyrdyk. Biz uniwersitetiň çägindäki bu Klubyň üsti bilen öz Watanymyzy, medeniýetimizi, dilimizi we öz milli aýratynlyklarymyzy tanatmak mümkinçiligine eýe bolduk. Biz häzire çenli birnäçe çäre gurnadyk. Ine, ýakynda bolsa, türkmen talyplar bolup, Türkiýäniň paýtagty Ankara şäherine gezelenç gurnadyk. Şol ýerde “Türkmenistan” seýilgägine, bu seýilgähe görk berip oturan Magtymguly Atamyzyň ýädygärligine baryp gördük. Şonda biz ol ýerde beýik Pyragynyň ajaýyp goşgularyny okadyk. Soňra Atatürküň ýädygärligine hem baryp gördük. Bu gezelenjime bize Bursa şäher häkimligi hemaýat berdi.
