Hytaýyň demirgazygyndaky Hebeý welaýatynyň Sýansi etrap dolandyryşy tarapyndan häzirki wagtda Beýik Hytaý diwarynyň durkuny dikeldiş işlerine girişilendigi habar berildi ― diýip, «Xinhua» habarlar agentligi ýazýar.
Bu işlere dünýä meşhur diwaryň günbatar böleginden ― Sifenkou ― Panszýakou aralygyndan başlanyldy. Işleri şu ýylyň ahyryna çenli tamamlamak meýilleşdirilýär.
Beýik Hytaý diwarynyň durkuny täzelemek işleri mundan ozal geçen asyryň 70-nji ýyllarynda geçirilipdi. Yzda galan ýarym asyr çemesi wagtyň dowamynda bu ýere millionlarda syýahatçy gelip gördi. Ýerli häkimiýet diwarlaryň täzeden abatlanylmagynyň has köp syýahatçyny çekmäge mümkinçilik berjekdigine ynanýar.