2026-njy ýylyň fewral aýynda Aşgabatda Türkiýe Respublikasynyň eksport harytlarynyň sergisi geçiriler. Bu barada Türkmenistanyň Prezidentiniň sanly ulgam arkaly Ministrler Kabinetiniň nobatdaky mejlisiniň dowamynda wise-premýer N.Atagulyýewiň hasabatynda bellenildi.
Bellenilişi ýaly, bu sergä gatnaşmaga isleg bildiren Türkiýäniň dürli ugurlarda iş alyp barýan kompaniýalarynyň 100-e golaýy hasaba alyndy. Bu kompaniýalar enjamlary we tehniki serişdeleri, binalaryň ýyladyş we sowadyş ulgamlaryny, himiki serişdeleri, demir we elektron harytlary beýleki önümleri öndürijiler we eksport edijiler bolup durýarlar. Şeýle hem gurluşyk, energetika, logistika, bilim we beýleki ulgamlarda iş alyp barýarlar. Şunuň bilen baglylykda, wise-premýer döwlet Baştutanynyň garamagyna degişli teklibi hödürledi.
Türkmenistanyň Prezidenti hasabaty diňläp, ýurduň daşary ýurtlar bilen söwda-ykdysady gatnaşyklaryny ösdürmäge uly ähmiýet berilýändigini we bu ugurda netijeli işleriň alnyp barylýandygyny belledi hem-de Aşgabat şäherinde geçiriljek Türkiýe Respublikasynyň eksport harytlarynyň sergisine taýýarlyk görmegi we guramaçylykly geçirmegi tabşyrdy.