Aşgabatda Türkiýe Respublikasynyň esasy milli baýramlarynyň biri bolan we her ýylyň 30-njy awgustynda bellenilýän Ýeňiş gününiň 104 ýyllygy mynasybetli dabaraly kabul edişlik geçirildi. “Ata Watan Media” toparynyň hem çagyrylan çäräsi Türkiýäniň Türkmenistandaky ilçihanasy tarapyndan guraldy.
Çäräni Türkiýäniň Türkmenistandaky ilçihanasynyň harby attaşesi açyp, ýygnanan myhmanlara gutlag sözi bilen ýüzlendi.
Soňra Türkiýe Respublikasynyň Türkmenistandaky täze Adatdan daşary we Doly ygtyýarly ilçisi Şener Jebeji myhmanlaryň öňünde çykyş etdi. Bu kabul edişlik onuň wezipä girişenden soňky ilkinji resmi çäresi boldy. Ilçi ýygnananlara çärä gatnaşandyklary üçin minnetdarlyk bildirip, Türkmenistandaky diplomatik işiniň dowamynda netijeli hyzmatdaşlyga ynam bildirýändigini belledi.
Soňra ol Türkiýe Respublikasynyň Prezidenti Rejep Taýyp Ärdoganyň gutlag ýüzlenmesini okady. Onda türk döwletiniň Baştutany Türkiýe Respublikasynyň yglan edilmegine esas döreden 1922-nji ýyldaky Beýik Ýeňşiň taryhy ähmiýetini belläp, ýurduň adalat, durnuklylyk we parahatçylyk ýörelgelerine ygrarlydygyny nygtady.
Dabarada türkmen tarapyna wekilçilik eden Türkmenistanyň daşary işler ministriniň orunbasary Ahmet Gurbanow hem çykyş etdi. Ol ýygnananlary Türkiýäniň milli baýramy bilen, ilçini bolsa täze wezipesine girişmegi bilen gutlady.
Ahmet Gurbanow türkmen-türk gatnaşyklary barada giňişleýin durup geçip, olary köpugurly we strategik häsiýete eýe gatnaşyklar hökmünde häsiýetlendirdi. Şeýle hem ol iki ýurduň ýolbaşçylarynyň yzygiderli özara saparlaryny, şol sanda Türkmenistanyň Halk Maslahatynyň Başlygy Gurbanguly Berdimuhamedowyň 2024-nji ýylyň mart aýynda Türkiýä amala aşyran saparyny hem-de Prezident Ärdoganyň 2025-nji ýylyň dekabrynda Türkmenistana amala aşyran saparyny belledi.
Ol iki ýurduň arasyndaky söwda dolanyşygynyň artýandygyny, medeniýet, bilim, syýahatçylyk we sport ulgamlarynda hyzmatdaşlygyň ösdürilýändigini hem nygtady.
Kabul edişlige Türkmenistanda akkreditirlenen ilçihanalaryň diplomatlary we daşary ýurt wekilhanalarynyň wekilleri gatnaşdylar.
Çäräniň resmi bölegi tamamlanandan soň, myhmanlar üçin agşamlyk nahary guraldy.