Türkmenistanyň Döwlet çeperçilik akademiýasy Geýdar Aliýew adyndaky gazna, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen bilelikde hem-de Azerbaýjan Respublikasynyň Türkmenistandaky ilçihanasynyň ýardam bermeginde 2026-njy ýylyň 20-nji oktýabry – 30-njy noýabry aralygynda Türkmenistanyň Döwlet çeperçilik akademiýasynda MAMA «Ene-Tebigat» atly halkara sungat sergisini öz işine başlady.
“Ata Watan Media” toparynyň hem gatnaşan halkara sungat sergisine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa, Azerbaýjan Respublikasynyň Geýdar Aliýew adyndaky gaznasynyň wise-prezidenti Leýla Aliýewa hem-de Özbegistan Respublikasynyň Prezidentiniň Diwanynyň ýolbaşçysy Saida Mirziýoýewa gatnaşdy.
MAMA «Ene-Tebigat» taslamasy häzirki zaman sungatyny, ekologiýa gün tertibini hem-de ynsanperwerlik ýörelgelerini özünde jemleýän giň gerimli halkara medeni başlangyçdyr. Bu taslamany ilkinji bolup öňe süren Geýdar Aliýew gaznasynyň wise-prezidenti, IDEA Jemgyýetçilik birleşiginiň esaslandyryjysy we ýolbaşçysy Leýla Aliýewadyr.
Serginiň guramaçylygyna esasy jogapkär bolup çykyş edýän Emin Mammadow häzirki zaman suratkeşleriniň eserlerini tebigaty ýaşaýşyň, taryhy hakydanyň we döredijilik ylhamynyň gözbaşy hökmünde açyp görkezýän bitewi çeperçilik konsepsiýasyny bir ýere jemledi.
Azerbaýjanda, Bahreýnde, Italiýada, Beýik Britaniýada, Gruziýada, Germaniýada, Albaniýada, Şweýsariýada, Latwiýada we Ispaniýada üstünlikli geçirilen görkezilişlerden soňra, sergi Azerbaýjan bilen Türkmenistanyň arasyndaky medeni hyzmatdaşlygyň täze sahypasyny açmak bilen, özüniň halkara syýahatyny dowam etdirýär.
Sergi nakgaşçylyk, heýkeltaraşlyk, installýasiýa, fotosurat, wideoşekilleri taýýarlamak, dokma sungaty we garyşyk media ýaly dürli çeperçilik ugurlarynda zähmet çekýän häzirki zaman suratkeşleriniň eserlerini özünde jemleýär. Awtorlyk çemeleşmeleriniň we çeperçilik dilleriniň köpöwüşginlidigine garamazdan, hödürlenýän işleriň ählisi ekologiýa jogapkärçiligi, biologik dürlüligi gorap saklamak, durnukly ösüş hem-de adam bilen daşky gurşawyň arasyndaky inçe deňagramlylyk mowzuklaryna ýüzlenmek bilen, adamyň tebigat bilen çylşyrymly özara baglanyşygyny ýüze çykarmaga gönükdirilendir.
Garaşylyşy ýaly, bu taslama çeperçilik we ylmy jemgyýetçiligiň, diplomatik wekilhanalaryň, döwlet, jemgyýetçilik guramalarynyň wekillerini, şeýle hem häzirki zaman sungatynyň köp sanly muşdaklaryny bir ýere jemleýän, Türkmenistanda şu ýyl bolup geçen möhüm halkara medeni çäreleriň birine öwrüler.
MAMA «Ene-Tebigat» çeperçilik sergisinden has giň gerimli taslamadyr. Ol adamyň we daş-töweregimizdäki dünýäniň arasyndaky çuň özara baglanyşygy barada oýlanmaga, medeni hakydany, taryhy mirasy we ruhy gymmatlyklary goramazdan, tebigaty aýawly saklamagyň mümkin däldigine akyl ýetirmäge çakylykdyr. Häzirki zaman sungatynyň ählumumy dili arkaly bu taslama dünýämiziň geljegi baradaky aladanyň adamyň durmuşdaky öz ornuna düşünmeginden hem-de geljekki nesilleriň öňünde jogapkärçilik duýgusyndan başlanýandygyny ýene-de bir gezek ýatladýar.
2025-nji ýylda Geýdar Aliýew adyndaky gazna bilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň arasynda özara düşünişmek hakynda Ähtnama gol çekilendigini bellemek gerek. Munuň özi bu iki guramanyň arasynda özara hyzmatdaşlygyň uzakmöhletleýin esasda ýola goýulmagy üçin berk binýady döretdi.