Aşgabat şäheriniň 140 ýyllygyna görülýän taýýarlyk işleriniň çäklerinde şu günler paýtagtymyzda giň gerimli arassaçylyk we abadanlaşdyryş işleri ýaýbaňlandyrylýar. Geçen şenbe we ýekşenbe günleri paýtagtymyz boýunça nobatdaky arassaçylyk çäresine has-da giň gerim berildi. Oňa edara-kärhanalaryň işgärleri, ýokary okuw mekdepleriniň mugallymlarydyr talyplary, şeýle-de paýtagtymyzyň ýaşaýjylary işjeň gatnaşdylar. Bu barada «Türkmenistan» gazeti habar berdi.
Mälim bolşy ýaly, döwlet Baştutanymyz 24-nji fewralda paýtagtymyzyň häkimliginde Aşgabadyň esaslandyrylmagynyň 140 ýyllyk baýramyna taýýarlyk görmek hem-de ony mundan beýläk-de ösdürmek meselelerine bagyşlanyp geçiren maslahatynda degişli ýolbaşçylara bu şanly senä gabatlanyp, paýtagtymyzy abadanlaşdyrmak, onuň arassaçylygyna ünsi güýçlendirmek babatynda birnäçe anyk tabşyryklary berdi.
Bu tabşyryklardan ugur alnyp, geçirilýän işleriň çäginde binalaryň ýanaşyk ýerlerinde, seýilgählerde, ýanýodalarda ekilen güllerdir baglara ideg işleri geçirildi. Baglaryň düýpleri ýumşadylyp, agardyldy. Olara timar berlip, düýpleri arassalandy. Paýtagtymyzyň ýaşaýjylary ýaşaýan ýerleriniň töwereklerinde, köçelerde arassaçylyk işlerine agzybirlikde, uly ruhubelentlikde gatnaşyp, bu asylly işe öz goşantlaryny goşdular. Aşgabadyň esaslandyrylmagynyň 140 ýyllyk baýramyna giňden taýýarlyk görülýän günlerde seýilgählerdir köçeler göze gelüwli bezelýär, abadanlaşdyrylýar.