«Artyk» gümrük nokadynda «Artyk-Lotfabad» gözegçilik-geçiriş ýerinde hereket edýän Türkmenistan bilen Eýran Yslam Respublikasynyň degişli edaralarynyň wekilleriniň üçünji duşuşygy geçirildi.
Türkmen tarapyndan duşuşyga Türkmenistanyň Daşary işler ministrliginiň, gümrük, serhet we migrasiýa gulluklarynyň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» we «Türkmendemirýollary» agentlikleriniň wekilleri we eýran tarapyndan Dargaz şäheriniň häkimi, «Lotfabad» gümrük nokadynyň başlygy we işgärleri, Lotfabaddaky serhet nokadynyň başlygy we işgärleri hem-de EYR Türkmenistandaky Ilçihanasynyň wekilleri gatnaşdy.
Duşuşyga gatnaşyjylar «Artyk» (Türkmenistan) we «Lotfabad» (Eýran Yslam Respublikasy) gözegçilik-geçiriş ýerleriniň geçirijilik kuwwatyny we iş wagtyny köpeltmek bilen baglanyşykly meseleleri ara alyp maslahatlaşdylar.
Gümrük serhetlerinden harytlaryň bikanun geçirilmeginiň öňüni almak babatda hyzmatdaşlyk gün tertibiniň aýratyn meselesi boldy. Şunuň bilen baglylykda, ygtybarly gümrük barlagyny amala aşyrmak barada meselä üns berildi.