Şu gün, 23-nji dekabrda geçirilen Türkmenistanyň Kubogy – 2024-iň final duşuşygynyň yzysüresi Ýokary liganyň hem-de ýaşlar toparlarynyň gatnaşmagyndaky futbol boýunça Türkmenistanyň birinjiliginiň ýeňijileriniň sylaglanyş dabarasy bolup geçdi.
Paýtagtymyzdaky “Aşgabat” stadionynda geçirilen sylag gowşurylyş dabarasynda ýurdumyzyň futbol çempionatynyň hem-de birinjiliginiň jemi boýunça ilkinji üç orny eýelän toparlara baýraklary TFF-niň başlygy Guwançmuhammet Öwekow, TFF-niň Baş sekretary Serdar Geldiýew hem-de Türkmenistanyň Bedenterbiýe we sport baradaky döwlet komitetiniň wekili Juma Jumaýew dagy gowşurdy.
Ýeri gelende bellesek, «Arkadag» topary bassyr ikinji ýyl wagtyndan öň çempionlyk derejesini gazandy. Wladimir Baýramowyň tälim berýänleri çempionatyň dowamynda ýeke utuk ýitirmezden çempion bolmagy başardylar.
Ikinji orny wagtyndan öň «Ahal» topary (67 utuk) eýelän bolsa, «Altyn Asyr» topary (59 utuk) çempionaty üçünji orunda tamamlady.
30 duşuşykda 83 utuk toplan «Arkadag II» topary ilkinji döredilen ýyly ýaşlar birinjiligini birinji orunda tamamlamagy başardy. Geçirilen duşuşyklarda 69 hem-de 57 utukdan toplan «Ahal II» bilen «Altyn Asyr II» toparlary birinjiligi degişlilikde ikinjidir, üçünji orunlarda tamamladylar.