Şu gün paýtagtymyz Aşgabadyň “Ýyldyz” myhmanhanasynda Ýewropada Howpsuzlyk we Hyzmatdaşlyk Guramasynyň (ÝHHG) Milli azlyklar boýunça Ýokary Komissarynyň edarasynyň gurnamagynda Merkezi Aziýa döwletleriniň we Mongoliýanyň bilim ministrleriniň tegelek stol duşuşygy geçirildi. Oňa “Ata Watan Media” topary hem gatnaşdy.
Merkezi Aziýada we Mongoliýada köpdilli bilim arkaly sebitleýin hyzmatdaşlygy ösdürmäge bagyşlanan bu duşuşyga Türkmenistanyň bilim ministri Jumamyrat Gurbangeldiýew, Täjigistanyň bilim we ylym ministri Rahim Saidzoda, Gyrgyz Respublikasynyň Bilim ministriniň orunbasary Nadira Žusupbekowa, Özbegistan Respublikasynyň bilim we ylym ministriniň orunbasary Ilhom Sirajew, Gazagystan Respublikasynyň Y.Altynsarin adyndaky Milli bilim akademiýasynyň prezidenti Zulfia Torebekowa, Mongoliýanyň Bilim ministrliginiň Ömürboýy we inklýuziw bilim bölüminiň başlygy Sarankhuu Gombodorj, şeýle hem ÝHHG Milli azlyklar boýunça Ýokary Komissarynyň bölümçe başlygy, baş maslahatçy Eleonora Lotti gatnaşdy.
Sebit ýurtlarynyň hem-de Mongoliýanyň arasynda bilim ulgamyndaky hyzmatdaşlygy ösdürmäge nagyşlanan duşuşykda çykyş eden Türkmenistanyň bilim ministri Jumamyrat Gurbangeldiýew Türkmenistanda bilim, ylmy we halkara ynsanperwer hyzmatdaşlygyny ösdürmegiň döwlet syýasatynyň ileri tutulýan ugurlarynyň biridigini belledi.
Ministriň bellemegine görä, strategik ugurlar milli bilim ulgamyny toplumlaýyn döwrebaplaşdyrmaga, ylmy ösdürmäge we ýaş nesil üçin giň mümkinçilikleri döretmäge gönükdirilendir. Häzirki wagtda 2028-nji ýyla çenli Türkmenistanda umumy bilim maksatnamalarynda okatmagyň usullaryny kämilleşdirmek konsepsiýasy we 2026–2052-nji ýyllar üçin Türkmenistanda ýokary hünär bilimini ösdürmegiň strategiýasy üstünlikli durmuşa geçirilýär.
– 2021-nji ýylda dil we medeni dürlüligi boýunça Ýewropada Howpsuzlyk we Hyzmatdaşlyk Guramasynyň Milli Azlyklar boýunça Ýokary Komissarynyň edarasy bilen hyzmatdaşlyk baradaky Ähtnamanyň gol çekilmegi aýratyn bellärliklidir. Şu günki tegelek stol bu yzygiderli syýasatyň logiki dowamydyr we Türkmenistanyň sebitleýin bilim hyzmatdaşlygyny ösdürmäge ygrarlydygyny ýene-de tassyklaýar.
Şu günki tegelek stoluň temasy halklaryny asyrlaryň dowamyndaky taryhy, medeni we ynsanperwer gatnaşyklary birleşdirýän Merkezi Aziýa we Mongoliýa döwletleri üçin has-da möhümdir.
Dil diňe bir aragatnaşyk we bilim almagyň serişdesi däl, eýsem her bir milletiň ruhy we medeni mirasynyň möhüm bölegidir. Köpdilli bilim halklaryň arasyndaky özara düşünişmegi berkitmek, akademiki alyş-çalyşlary giňeltmek, ýaşlaryň hünär başarnyklaryny ösdürmek we bilimiň hilini ýokarlandyrmak üçin täze mümkinçilikleri açýar. Şol bir wagtyň özünde, köpdilli bilimiň ösdürilmeginiň her bir döwletiň milli aýratynlyklaryny, kanunçylygyny we bilim ileri tutulýan ugurlaryny göz öňünde tutup amala aşyrylmalydygyna ynanýarys – diýip, ministr belledi.
Duşuşygyň dowamynda sebit ýurtlary hem-de Mongoliýanyň bilim edaralarynyň wekilleri köpdilli bilimiň ösdürilmeginiň ugurlaryny, bu ugurda hyzmatdaşlyk ösdürmäge degişli teklip boýunça pikir alyşdylar.