ABŞ-nyň Döwlet sekretary Marko Rubio Merkezi Aziýa döwletleriniň maýa goýumlaryny bilelikde çekip, söwda hyzmatdaşlygyny ösdürip we özygtyýarlylygyny berkitmek hem-de ilatyň abadançylygyny ýokarlandyrmak üçin zerur serişdeler bilen özlerini üpjün edip biljekdigini mälim etdi. Ol bu barada Merkezi Aziýa ýurtlarynyň we ABŞ-nyň daşary işler ministrleriniň «C5+1» formatyndaky duşuşygyndaky çykyşynda belledi.
«Biz bilelikde ýurtlarymyzyň her biriniň özygtyýarly döwlet bolup galmagyny üpjün etmek we umumy abadançylygymyzy ýokarlandyrmak üçin zerur bolan serişdeleri, maýa goýumlaryny, mümkinçilikleri we söwda hyzmatdaşlygyny döredip bileris» diýip, Rubio belledi.
Onuň aýtmagyna görä, «C5+1» formaty Waşingtonyň Merkezi Aziýa döwletleri bilen parahatçylykly gatnaşyklary berkitmäge bolan gyzyklanmasyny we hyzmatdaşlygy mundan beýläk-de ösdürmäge ygrarlydygyny görkezýär.
Döwlet sekretary hyzmatdaşlygyň amaly ugurlarynyň hatarynda Transhazar söwda geçelgesiniň ulag infrastrukturasyny döwrebaplaşdyrmagy, sebitdäki kompaniýalaryň ABŞ-nyň we Merkezi Aziýanyň bazarlaryna çykmak mümkinçiliklerini giňeltmegi, şeýle hem ýokary goşulan gymmatly strategik taýdan möhüm mineral serişdeler boýunça bitewi üpjünçilik zynjyrlaryny ösdürmegi aýratyn belledi.
Mundan başga-da, Waşington öňdebaryjy amerikan tehnologiýalary bilen işlemek üçin hünärmenleri taýýarlamaga ýardam bermegi meýilleşdirýär. Rubionyň aýtmagyna görä, gürrüň Merkezi Aziýanyň ösýän tehnologiýa pudagy üçin müňlerçe ýaş hünärmeni taýýarlamak barada barýar.
Ol ykdysady gatnaşyklary giňeltmegiň ýene bir möhüm guraly hökmünde döwlet bilen işewür toparlaryň arasyndaky dialogy ösdürmäge, şeýle hem özara söwdanyň we maýa goýumlarynyň möçberini artdyrmaga ýardam etmegi maksat edinýän «B5+1» işewürlik forumyny görkezdi.
Rubio, şeýle hem geçen ýyl Waşingtonda geçirilen «C5+1» duşuşygyny ýatlatdy. Onuň sözlerine görä, Ak tamda geçirilen bu çäre ulag, energetika, maliýe we ykdysadyýetiň beýleki möhüm pudaklaryny berkitmäge gönükdirilen umumy bahasy 25 milliard ABŞ dollaryna barabar bolan täze şertnamalaryň baglaşylmagyna getirdi.
Döwlet sekretarynyň bellemegine görä, şol wagt ABŞ-nyň Prezidenti Donald Tramp we Merkezi Aziýa döwletleriniň Liderleri söwdanyň we maýa goýumlarynyň ösdürilmegine ýardam berýän kadalaşdyryjy şertleri hem-de zähmet bazaryndaky düzgünleri kemala getirmek barada ylalaşypdylar.
Çykyşynyň ahyrynda Rubio Merkezi Aziýa ýurtlarynyň ählisiniň öz medeniýeti we milli bähbitleri bolan, geljegini özbaşdak kesgitlemäge hukukly özygtyýarly döwletlerdigini nygtady. Onuň bellemegine görä, ABŞ bu döwletleriň gülläp ösmegini isleýär we şol ýolda ygtybarly hyzmatdaş bolmaga taýýardyr.