Türk kompaniýalary “akylly şäher” konsepsiýasy esasynda gurulýan Arkadag şäheriniň ikinji tapgyryny hem öz içine alýan, Türkmenistanyň geljegi uly taslamalarynda täze işleri ýerine ýetirmäge taýýardyr. Bu barada Türkiýäniň Aşgabatdaky ilçisi Ahmet Demirok metbugat ýygnagynda aýtdy.
«Baý tebigy serişdeleri we türkmen halkynyň zähmetsöýerligi netijesinde Türkmenistan häzirki wagtda dünýäde iň çalt ösýän ykdysadyýetleriň birine öwrüldi», – diýip diplomat belledi.
Onuň bellemegine görä, Garaşsyzlygynyň 35 ýylynyň dowamynda Türkmenistan nusgalyk şäherleri, dünýä derejesindäki ýollary, howa menzilleri, zawodlary, mekdepleri we hassahanalary bolan döwrebap döwlete öwrüldi.
Demirok türk tarapynyň öz kompaniýalarynyň ýurduň iri maýa goýum taslamalaryna goşan goşandyna buýsanýandygyny nygtady. «Kompaniýalarymyza berilýän goldaw üçin Türkmenistanyň hökümetine minnetdarlyk bildirýäris», – diýip ol aýtdy.
Ilçi, Türkmenistanyň garaşsyzlygyny alaly bäri türk kompaniýalarynyň ýurtda umumy bahasy 54 milliard ABŞ dollaryndan geçýän 1000-den gowrak taslamany üstünlikli ýerine ýetirendigini habar berdi. Olaryň hatarynda elektrik stansiýalary, elektrik geçiriji liniýalar, awtomobil ýollary, ýaşaýyş jaýlary, söwda merkezleri, uniwersitetler, mekdepler, myhmanhanalar, zawodlar, muzeýler, seýilgähler, hassahanalar we portlar bar.