Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Wolynkin Türkmenistanyň Garaşsyzlygynyň 34 ýyllygyny gutlady. Ol öz gutlag hatynda türkmen-rus gatnaşyklarynyň işjeň ösdürilýändigini belläp, şu ýylyň oktýabrynda Aşgabatda türkmen-rus hökümetara toparynyň nobatdaky mejlisiniň geçirilýändigini belledi.
Russiýanyň ilçisiniň gutlagynda şeýle diýilýär:
Hormatly dostlar!
Türkmenistanyň dostlukly halkyna we çuňňur hormatlanylýan Prezidenti Serdar Gurbangulyýewiç Berdimuhamedowa Garaşsyzlygyň 34-nji ýyllygy mynasybetli iň ýürekden çykýan gutlaglarymy beýan etmäge rugsat ediň. Şeýle hem, Türkmen halkynyň çuňňur hormatlanylýan Milli Lideri, Türkmenistanyň Halk Maslahatynyň Başlygy Gurbanguly Mälikgulyýewiç Berdimuhamedowy bu şanly sene bilen gutlamak isleýärin.
Russiýa Federasiýasy Türkmenistanyň Garaşsyzlygyny ilkinjileriň biri bolup ykrar etdi we BMG-niň meýdançasynda onuň Bitaraplyk derejesini yzygiderli goldaýar. Häzirki wagtda türkmen döwletiniň özboluşly daşary syýasy ugry halkara derejede uly abraýdan peýdalanýar, sebit we ählumumy derejede durnuklylygy we howpsuzlygy pugtalandyrmaga ýardam berýär. Dünýä bileleşigi tarapyndan biragyzdan goldanylan BMG-niň Baş Assambleýasynyň «2025-nji ýyl – Halkara parahatçylyk we ynanyşmak ýyly» atly Kararnama hut Türkmenistan tarapyndan teklip edildi. Şu ýyl siziň ýurduňyzyň we bütin planetanyň türkmen halkynyň döredijilikli we parahatçylyk söýüjilik başlangyjyny nygtaýan bir şygar bilen ýaşamagy we ösmegi bellärliklidir.
Russiýa Federasiýasy bilen Türkmenistanyň arasynda taryhy taýdan dörän doganlyk gatnaşyklary bar. Pursatdan peýdalanyp, Eýran bilen göni howa gatnawynyň wagtlaýyn ýok wagtynda ýüzlerçe rus raýatyny Watanlaryna gaýtaryp getirmäge işjeň gatnaşandygy üçin Türkmenistanyň ýolbaşçylaryna ýene bir gezek minnetdarlyk bildirmek isleýärin.
Biziň döwletlerimiziň Liderleriniň arasynda ynamly gatnaşyklaryň ýola goýulandygy begendirijidir, bu bolsa ikitaraplaýyn gatnaşyklaryň üstünlikli ösdürilmegine kepil geçýär. Şu ýyl biz wekiliýetleriň işjeň alyşmalaryny synlaýarys, iň giň meseleler boýunça özara düşünişmäge ýetildi, bu bolsa Moskwanyň we Aşgabadyň halkara gün tertibiniň esasy ugurlary boýunça umumy çemeleşmelerini ýene bir gezek tassyklaýar. Çuňňur hormatlanylýan Serdar Gurbangulyýewiçiň 9-njy maýda Moskwa sapary, çuňňur hormatlanylýan Gurbanguly Mälikgulyýewiçiň Kazan Forumyna gatnaşmagy, uly türkmen wekiliýetiniň Peterburg Halkara Ykdysady Forumynyň işine we rus wekilleriniň Awazadaky BMG-niň maslahatyna gatnaşmagy, daşary syýasy edaralaryň ýolbaşçylarynyň ýaňky bolup geçen özara saparlary – ähli bu ähmiýetli çäreler biziň strategik hyzmatdaşlygymyzy pugtalandyrýar.
Ikitaraplaýyn gatnaşyklaryň işjeňligini hasaba almak bilen, häzirki wagtda gazanylan oňyn depgini saklamak we goldamak aýratyn möhümdir. Şu ýylyň oktýabr aýynyň ortalarynda Aşgabatda geçirilmegi meýilleşdirilýän ykdysady hyzmatdaşlyk boýunça türkmen-rus hökümetara toparynyň nobatdaky mejlisi hem muňa ýardam berer.
Hormatly dostlar!
Sözümiň ahyrynda, Türkmenistanyň çuňňur hormatlanylýan Prezidenti Serdar Gurbangulyýewiç Berdimuhamedowy we Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Mälikgulyýewiç Berdimuhamedowy, olaryň şahsyýetinde bolsa Türkmenistanyň doganlyk halkyny Garaşsyzlygyň 34 ýyllygy bilen ýene bir gezek gutlamak we ähliňize tüýs ýürekden bagt, saglyk, üstünlik we abadançylyk arzuw etmek isleýärin!