Gyrgyz Respublikasynyň paýtagty Bişkek şäherinde Türkmenistan bilen Gyrgyzystanyň daşary syýasat edaralarynyň arasynda syýasy geňeşmeler geçirildi. Türkmen tarapyna – Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, gyrgyz tarapyna – Gyrgyz Respublikasynyň daşary işler ministri Žeenbek Kulubaýew başlyklyk etdi.
Duşuşykda ministrler iki ýurduň arasynda söwda, ykdysady, maýa goýumlary, ulag we logistika, energiýa pudaklary, şeýle hem beýleki möhüm ugurlar hem-de ikitaraplaýyn hyzmatdaşlygyň geljegi baradaky meselelerini ara alyp maslahatlaşdylar.
Öňde boljak ikitaraplaýyn çäreleri iň ýokary derejede guramaga we geçirmäge, şertnama-hukuk binýadynyň giňeltmäge, şeýle hem halkara guramalarynyň çäklerinde gatnaşyklary ösdürmäge aýratyn üns berildi.
Şu nukdaýnazardan ministrler Gyrgyz Respublikasynyň Prezidenti Sadyr Žaparowyň Türkmenistana (2021-nji ýylyň 27-28-nji iýuny) resmi sapary wagtynda gazanylan ylalaşyklary durmuşa geçirmegiň gidişine syn berdiler.
Geçirilen geňeşmelerden soň iki ýurduň daşary syýasat edaralarynyň ýolbaşçylary R. Meredow we Ž.Kulubaýew 2025-2026-njy ýyllar üçin Gyrgyzystanyň Daşary işler ministrligi bilen Türkmenistanyň Daşary işler ministrliginiň arasynda hyzmatdaşlyk Maksatnamasyna gol çekdiler.