Şu gün Türkmenistanyň Prezidenti Serdar Berdimuhamedowyň başlyklyk etmegine paýtagtymyz Aşgabatda beýik türkmen şahyry we Gündogaryň akyldary Magtymguly Pyragynyň doglan gününiň 300 ýyllygyna bagyşlanan «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumy geçirilýär. Bu halkara forumy Türkmenistanyň Söwda-senagat edarasynyň kaşaň binasynda geçirildi.
Halkara maslahata gatnaşmak üçin Russiýanyň Prezidenti Wladimir Putin, Eýranyň Prezidenti Masud Pezeşkian, Ermenistanyň Prezidenti Waagn Haçaturýan, Mongoliýanyň Prezidenti Uhnaagiýn Hurelsuh, Pakistanyň Prezidenti Asif Ali Zerdari, Özbegistanyň Prezidenti Şawkat Mirziýoýew, Gazagystanyň Prezidenti Kasym-Žomart Tokaýew, Gyrgyzystanyň Prezidenti Sadyr Žaparow, Täjigistanyň Prezidenti Emomali Rahmon, Tatarystanyň Baştutany Rustam Minnihanow, şeýle hem iri halkara we sebit guramalaryň ýolbaşçylary gatnaşdy.
Myhmanlaryň hatarynda Türkiýe Respublikasynyň Beýik Millet Mejlisiniň Başlygy Numan Kurtulmuş, ÝUNESKO-nyň Baş konferensiýasynyň Başlygy, Halkara guramalaryň ýolbaşçylary, daşary ýurtlaryň hökümet agzalary, tanymal alymlar, medeniýet işgärleri we diplomatlar bar.
Türkmenistanyň Prezidenti halkara foruma gatnaşmaga gelen döwlet Baştutanlaryny mähirli garşylady we soňra bilelikdäki surata düşmek dabarasy geçirildi.
Soňra halkara forum öz işine başlady. Forumyň açylyş dabarasynda çykyş eden Türkmenistanyň Prezidenti Serdar Berdimuhamedow bu forumyň halkara ähmiýetini belläp, onuň dünýä döwletleriniň arasyndaky medeni-ynsanperwer gatnaşyklary ösdürmekde wajyp bolup durýandygyny aýtdy.
Magtymgulynyň galdyran mirasynyň türkmen halkynyň baýlygy bolup durýandygyny bellän döwlet Baştutanymyz bu foruma gatnaşmak üçin gelen döwlet Baştutanlaryna özüniň minnetdarlygyny bildirdi.
2024-ni ýylyň Magtymguly Pyragynyň ady bilen baglanyşykly bolup, üstümizdäki ýylda köp sanly çäreler geçirildi, daşary ýurtlarda beýik şahyryň heýkelleri oturdyldy, Aşgabatda “Magtymguly Pyragy” seýilgäh toplumyny açyldy we şol toplumda dünýäniň ençem döwletleriniň şahyrlarynyň ýadygärlikleri oturdyldy, diýip hormatly Prezidentimiz belledi.
Halkara forumda oňa gatnaşyjy döwletleriň Baştutanlary çykyş etdiler.