Awstriýanyň, Germaniýanyň we Türkiýäniň kompaniýalary Türkmenistanda ilkinji ýerasty gaz saklaýyş desgasyny döretmek boýunça taslamany durmuşa geçirmäge dalaş edýärler. Taslamanyň ýerine ýetirijisini saýlamak boýunça bäsleşik jemleýji tapgyra ýetdi. Bu barada «Türkmengaz» döwlet konserniniň başlygy Maksat Babaýew žurnalistlere habar berdi.
«Häzirki wagtda kompaniýalaryň tekliplerine garamak işi jemleýji tapgyrda. Ýakyn wagtda FEED (Front End Engineering Design – deslapky inženerçilik taslamalaşdyryş) işlerini ýerine ýetirjek ýeňijini kesgitläris. Dalaşgärleriň arasynda Germaniýanyň, Awstriýanyň, Türkiýäniň we beýleki birnäçe ýurduň kompaniýalary bar» diýip, ol «Türkmenistanyň nebiti we gazy – 2026» atly halkara maslahatynyň jemleri boýunça geçirilen metbugat maslahatynda aýtdy.
Maksat Babaýew tender bäsleşigine jemi ýedi kompaniýanyň gatnaşýandygyny hem belledi.
Taslama laýyklykda, 5 milliard kub metr gaz saklamaga ukyply ýerasty gaz saklaýyş desgasyny gurmak meýilleşdirilýär. Bu desga tebigy gaza bolan möwsümleýin islegiň üýtgemelerini sazlamaga we gaz eksport ugurlarynyň ygtybarlylygyny ýokarlandyrmaga mümkinçilik berer.