Portugaliýaly hüjümçi, bäş gezek «Altyn top» baýragynyň eýesi we futbol taryhynyň iň köp gol geçiren oýunçylarynyň biri Kristiano Ronaldo sport karýerasyny dowam etdirýän türgenleriň arasynda ilkinji bolup 2 milliard dollar gazandy. Bu barada “Forbes” neşiri habar berdi.
Neşiriň hasaplamalaryna görä, futbolçy 2026/27-nji möwsümde Saud Arabystanynyň «Al-Nasr» klubundaky çykyşlary üçin 250 million dollar, mahabat şertnamalaryndan we beýleki telekeçilik taslamalaryndan bolsa goşmaça 50 million dollar girdeji gazanýar.
Çeşmäniň bellemegine görä, geljek ýyl ABŞ-nyň «Inter Maýami» klubunda çykyş edýän argentinaly hüjümçi Lionel Messiniň hem umumy girdejisiniň 2 milliard dollardan geçmegine garaşylýar.
41 ýaşly Ronaldo bäş gezek UEFA-nyň Çempionlar ligasynyň ýeňijisi, Ýewropa çempiony we iki gezek UEFA-nyň Milletler ligasynyň ýeňijisi boldy.
Ol milli ýygyndylaryň, Ýewropa çempionatlarynyň, Çempionlar ligasynyň we klublaryň arasyndaky dünýä çempionatlarynyň taryhynda iň köp gol geçirmek boýunça rekordlara eýedir.
Ronaldo 2022-nji ýylyň dekabryndan bäri Saud Arabystanynyň «Al-Nasr» klubunda çykyş edýär. Ol futbol karýerasynyň dowamynda Portugaliýanyň «Sporting», Angliýanyň «Mançester Ýunaýted», Ispaniýanyň «Real Madrid» we Italiýanyň «Ýuwentus» klublarynda hem oýnady.