Türkmenistanyň Gruziýadaky Adatdan daşary we Doly ygtyýarly ilçisi D.Seýtmämmedow bilen Gruziýanyň medeniýet we sport ministriniň birinji orunbasary I.Baghaturiýanyň arasynda duşuşyk geçirildi.
Duşuşykda taraplar ähli ugurlar boýunça türkmen-gruzin gatnaşyklarynyň işjeň ösýändigini kanagat bilen bellediler, hususan-da iki ýurduň arasyndaky hyzmatdaşlykda medeni alyş-çalyşlaryň möhümdigi hem-de oňyn goşant goşýandygyny nygtadylar.
Ilçi beýik türkmen şahyry we akyldary Magtymguly Pyragynyň doglan gününiň şanly 300 ýyllygyna bagyşlanyp dabaraly çäreleriň Türkmenistanda hem-de daşary ýurtlarda geçirilýändigini aýtdy.
I.Baghaturiýa Aşgabatda «Magtymguly Pyragy» medeni-seýilgäh toplumynyň we gruzin şahyry Şota Rustaweliniň heýkeliniň açylyş dabarasyna gatnaşmaga döredilen mümkinçilik üçin türkmen tarapyna ýene-de bir gezek minnetdarlyk bildirdi. Şeýle-de, beýik türkmen şahyryna bagyşlanan medeni çäreleriň ýylyň dowamynda Gruziýada hem geçiriljekdigini aýtdy.
Duşuşygyň dowamynda taraplar Türkmenistanyň Medeniýet günlerini Gruziýada geçirmek meselesini hem ara alyp maslahatlaşdylar. Munuň özi milli medeniýetiň, sungatyň, edebiýatyň, türkmen halkynyň taryhynyň giňden ýaýbaňlandyrmagyna, medeni-ynsanperwer hyzmatdaşlygy has-da baýlaşdyrmagyna, iki ýurduň halklaryň arasyndaky dostlugy we özara düşünişmegi pugtalandyrjakdygyna berk ynam bildirdiler.