28-nji iýulda Hytaýyň günorta-günbataryndaky Syçuan welaýatynyň Çendu şäherinde XXXI Bütindünýä tomusky Uniwersiada oýunlary badalga alýar. Bu sport ýaryşy 8-nji awgusta çenli dowam eder. Halkara ýaryşa Türkmenistandan hem türgenler gatnaşýar.
XXXI Bütindünýä tomusky Uniwersiada oýunlary 2021-nji ýylda geçirilmelidi. Ýöne koronawirus ýokanjy sebäpli ol yza süýşürildi. 2022-nji ýylda Halkara talyplar sport federasiýasynyň ýerine ýetiriji komiteti 2023-nji ýylyň 28-nji iýuly-8-njy awgusty aralygynda bu sport ýaryşyny geçirmek babatda karar kabul etdi.
Dünýäniň dürli ýurtlaryndan talyp türgenleriň gatnaşýan bu sport ýaryşynda sportuň 18 görnüşi boýunça 269 medal toplumy ugrunda bäsleşiler. Sport çäresini ýokary guramaçylyk ýagdaýynda geçirmek üçin 20 müňden gowrak meýletinçi çekildi.
Çendu şäherindäki tomusky Uniwersiada oýunlarynyň açylyş dabarasyna Hytaý Halk Respublikasynyň Başlygy Si Szinpin hem gatnaşar.
Hytaý 3-nji gezek Bütindünýä tomusky Uniwersiada oýunlaryny kabul edýär. Mundan ozal, şeýle ýaryş 2001-nji ýylda Pekinde we 2011-nji ýylda Şençžen şäherinde geçirilipdi.
Türkmenistanyň talyplar ýygyndysynyň türgenleri tomusky Uniwersiadada ýeňil atletika, uşu, suwda ýüzmek, dzýudo boýunça guraljak ýaryşlara gatnaşarlar.