Türkmenistanda bolmagyň dowamynda Koreýa Respublikasynyň Milli Assambleýasynyň Başlygy hem-de onuň ýanyndaky wekiliýet üçin Arkadag şäherine gezelenç guraldy. Koreýaly myhmanlar täze şäheriň gözel künjekleri hem-de medeni-durmuş we beýleki maksatly desgalaryň uly toplumyny özünde jemleýän infrastrukturasy bilen tanyşdylar.
Myhmanlar Köpetdagyň gözel künjeginde ýerleşýän we kanun esasynda “Döwlet ähmiýetli şäher” diýen aýratyn hukuk ýagdaýyna eýe bolan Arkadag şäherini synlap, onuň binagärlik keşbiniň hem-de şäher ilatynyň ýaşamagy üçin döredilen oňaýly şertleriň özlerinde uly täsir galdyrandygyny bellediler.
Täze şäheriň türkmen topragynyň iň gözel ýerleriniň birinde –ady rowaýata öwrülen ahalteke bedewleriniň watanynda gurulmagy hem bellärliklidir. Ginnesiň rekordlar kitabyna girizilen Akhan bedewiniň keşbini janlandyrýan heýkeltaraşlyk kompozisiýasy şähere aýratyn bezeg berýär. Şäheriň çäginde Aba Annaýew adyndaky Halkara atçylyk akademiýasy we Atçylyk ylmy-önümçilik merkezi ýerleşýär.
Şeýle hem koreýaly myhmanlar Arkadag şäheri bilen tanyşlygyň dowamynda Görogly adyndaky Döwlet atçylyk sirkine baryp gördüler we bu ýerde “Galkynyş” milli at üstündäki oýunlar toparynyň çykyşlaryna tomaşa etdiler.
Döwlet sirkiniň meýdançasynda meşhur Akhan atly ahalteke atynyň çarpaýa galyp ýöremegi şowhun bilen garşylanyldy.
Şeýle hem şol gün Koreýa Respublikasynyň Milli Assambleýasynyň Başlygy hem-de onuň ýanyndaky wekiliýetiň agzalary üçin Aşgabatda ýerleşýän Türkmen halysynyň milli muzeýine gezelenç guraldy.
Haly dokamagyň müňýyllyklara uzap gidýän däpleri häzirki döwürde türkmen halyçy zenanlary tarapyndan mynasyp dowam etdirilýär. Türkmen halysynyň özboluşly göllerinde halkymyzyň taryhy we durmuş filosofiýasy, mähriban topragymyzyň gözelligi öz beýanyny tapýar.
Koreýaly myhmanlar muzeýdäki gadymy we häzirki döwre degişli halylary uly gyzyklanma bilen synlap, türkmen halyçy zenanlarynyň zehininiň we ussatlygynyň aýdyň subutnamasy bolan bu eserlere haýran galandyklaryny aýtdylar.