Türkmenistan mart aýynda Hytaýa iberilen tebigy gazyň möçberini 2.9 milliard kubmetre ýetirdi. Bu barada Hytaýyň Gümrük müdirligi habar berýär.
Türkmenistandan gaz geçirijiler arkaly Hytaýa iberilen tebigy gazyň möçberi ýanwar-aprel aralygynda 18.9 göterim artyp, 3.41 milliard dollara deň boldy.
Habar berilmegine görä, Merkezi Aziýanyň eksport edijileri ýyladyş möwsüminiň tamamlanmagy bilen Hytaýa iberilýän tebigy gazyň möçberini yzygiderli artdyrýarlar.
Gazagystan mart aýynda Hytaýa 380 million kubmetr tebigy gaz eksport edip, her aýda bu möçberi ýene-de 100 million kubmetr artdyrmak mümkinçiligine eýedir.
Özbegistan bolsa, 3 aýdan soňra tebigy gazyň eksportuny gaýtadan dikeldip, mart aýynda 140 million kubmetr tebigy gaz iberdi. Eksport möçberini 4 esse artdyrmak mümkinçiligine eýedir.
Hytaý turba geçirijileri arkaly Merkezi Aziýanyň 3 ýurdundan – Türkmenistandan, Gazagystandan we Özbegistandan, şeýle hem Russiýadan we Mýanmadan tebigy gaz satyn alýar.
Sian şäherinde geçirilen “Merkezi Aziýa-Hytaý” sammitinde Hytaýyň Başlygy Si Szinpin sebit ýurtlary bilen energetika hyzmatdaşlygyny giňeltmäge taýýardygyny mälim etdi. Hususan-da, ol Merkezi Aziýa-Hytaý gaz geçirijisiniň 4-nji liniýasyny gurmak işini çaltlandyrmagy teklip etdi.